რეზოლუციის რეჟიმში მყოფი ბანკის წილი მარტივად გასხვისდება
რეზოლუციის რეჟიმში მყოფი კომერციული ბანკის წილის გასხვისება ეროვნულ ბანკს შემძენის სრულყოფილი შესწავლის გარეშეც შეეძლება, თუმცა გარკვეული პირობებით.
თუკი ვერ მოხდა 10, 25 ან 50%-ზე მეტი წილის შემძენის მიერ სწრაფად დოკუმენტაციის წარდგენა, ეროვნულ ბანკს შეეძლება გაასხვისოს წილი, თუმცა შეფასების განხორციელებამდე შეზღუდოს აქციებთან დაკავშირებული ხმის უფლებები ან ხმის უფლება თავად გამოიყენოს.
ამასთან, თუ აღმოჩნდება, რომ შემძენი ვერ აკმაყოფილებს შესაფერისობის კრიტერიუმებს, სებ-ი შეძლებს აქციების გასხვისება მოითხოვოს, ან სხვა საზედამხედველო ზომები და სანქციები გამოიყენოს.
კანონით, რეზოლუციის რეჟიმში მყოფი კომერციული ბანკის წილის გასხვისებაზე თანხმობის გაცემა გამარტივებული გზით მოხდება.
ეროვნული ბანკი ვალდებულია წილის შემძენის რეპუტაცია და სახსრების წარმომავლობა 10 სამუშაო დღის ვადაში შეაფასოს და შედეგების გათვალისწინებით თანხმობა ან უარი განაცხადოს.
ამასთან, სებ-ის პრეზიდენტის ბრძანებით, წილის შეძენის შემდეგ, პირი ან კომპანია ვალდებული იქნება მარეგულირებელს სრულყოფილი ინფორმაცია უნდა წაუდგინოს.
თანხმობის მისაღებად კი აუცილებელია დეკლარაციაში მითითებული იყოს საიდენტიფიკაციო მონაცემები; მონაცემი, რომ დეკლარანტი ან სხვა წილის შემძენი ბენეფიციარები არ არიან ნასამართლევი მძიმე ან განსაკუთრებით მძიმე დანაშაულისათვის, ტერორიზმის დაფინანსებისათვის ან/და უკანონო შემოსავლის ლეგალიზაციისათვის ან სხვა ეკონომიკური დანაშაულისათვის; ასევე აუცილებელია მნიშვნელოვანი წილის შეძენისათვის საჭირო თანხის წარმომავლობის შესახებ ინფორმაციის წარდგენაც.
