ყველაზე მეტი პრობლემური სესხი ჰორეკა სექტორშია

სებ-ის სტატისტიკით, ბანკების საზედამხედველო კაპიტალთან /უმოქმედო სესხების (მინუს რეზერვები) წილი, სექტემბრის მდგომარეობით (01.09.2023) 4.1%-ია.  

მთლიან პორტფელთან კი 1.66%-მდეა შემცირებული (IFRS-ით). სებ-ი ბანკების პორტფელის გაჯანსაღებას მსესხებელთა ფინანსური  განათლების გაზრდას უკავშირებს. ასევე პასუხისმგებლიანი დაკრედიტების ჩარჩოს, რაც რეგულაციების გამკაცრებაში გამოიხატება და რამაც ვალაუვალი მომხმარებელი მსესხებელთა ბაზიდან ნელ-ნელა განდევნა. 

₾1 500-მდე შემოსავლიან მსესხებელს მოკლევადიანი საჭიროების დაკმაყოფილება გაუჭირდა, რადგან სესხზე ხელმისაწვდომობა შეეზღუდა. აღნიშნული კატეგორიიდან უმეტესობა უკმაყოფილოა დაფინანსება რომ ვერ მიიღო და არ აბედნიერებს ის, რომ სესხის არ აღებით, სამაგიეროდ გრძელვადიანი ფინანსური პრობლემები აირიდა თავიდან. 

გრძელვადიან პერსპექტივაში ჭვრეტა ბევრს უჭირს, როცა მოკლევადიანი საჭიროება უდგას. სასესხო რეგულაციები სწორედ იმისთვისაა რომ აიძულოს, პრობლემის მოკლევადიან გადაჭრისას მომავალზე იფიქროს, აღნიშნულმა ნაბიჯმა გრძელვადიანი პრობლემა არ გაუჩინოს.

01.09.2023-ის მდგომარეობით, პრობლემური სესხების მოცულობა 870 მლნ ლარის ფარგლებშია. ბანკების მთლიანი დაკრედიტების მოცულობა კი 50 მლრდ ლარს აღემატება. 

ბანკების პორტფელში, ყველაზე მეტი პრობლემური კრედიტი ჰორეკა სექტორისთვის გაცემულ სესხებშია. 4.5%, 11.2 მლნ ლარის, მოდის ადგილობრივ ვალუტით დენომინირებულ სესხებზე და 10.5% აშშ დოლარის სესხებზე. 

გაპრობლემების მაღალი კოეფიციენტით ხასიათდება ტურისტული მიმართულება (სასტუმრო-ტურიზმი), აშშ დოლარის პორტფელში, 7%-მდე უმოქმედო სესხების წილით.