პრემიერი: ვიწყებთ საპარტნიორო ფონდის რეფორმას
მთავრობა საპარტნიორო ფონდის რესტრუქტურიზაციაზე ფიქრობს.
პრემიერის ირაკლი ღარიბაშვილის განცხადებით, შესაბამისი საკანონმდებლო ცვლილება პარლამენტში დეკემბერში დარეგისტრირდება.
"ვიწყებთ საპარტნიორო ფონდის რეფორმას. მოხდება ფონდის რესტრუქტურიზაცია. ამის შესახებ შესაბამისი საკანონმდებლო ცვლილებები პარლამენტში დეკემბერში დარეგისტრირდება", - განაცხადა პრემიერმა.
შეგახსენებთ, რომ „საპარტნიორო ფონდის“ რეორგანიზაციაზე ბოლო 2 წლის განმავლობაში აქტიურად საუბრობენ. არსებული გეგმის მიხედვით, საპარტნიორო ფონდი „საქართველოს განვითარების ფონდად“ უნდა გარდაიქმნას. შედეგად, 2022 წლის დასაწყისიდან შესაძლებელი გახდება საქართველოს განვითარების ფონდის რეფორმირებული სახით და სრულყოფილად ამოქმედება.
„საპარტნიორო ფონდის“ არსებულ მოდელს და მისი საინვესტიციო აქტივობას იწუნებს საერთაშორისო სავალუტო ფონდი. IMF-ის რეკომენდაციითვე „საპარტნიორო ფონდს“ საქმიანობა შეზღუდული აქვს.
