პაშა ბანკმა ტოპ ქარდის შესატანი გაზარდა

პაშა ბანკმა საკრედიტო პირობების ცვლილებაზე განაცხადა. რე/ბანკის 4 წლიანი ბარათის მინიმალური შესატანი, რომელიც 4-წლიან პერიოდზე ანგარიშდებოდა, ოქტომბრიდან 3 წელზე გადათვლით ანგარიშდება, რამაც ყოველთვიური სასესხო ტვირთი 17%-ით გაზარდა.

მაგ: თუ ₾3 500 ლიმიტიან ტოპ ქარდზე, მსესხებელი, თვეში ფიქსირებულ 137 ლარს იხდიდა, ოქტომბრიდან 160 ლარზე მეტის გადახდა უწევს.

ბანკში განაცხადეს, რომ ბარათის პირობების ცვლილება შარშან ამოქმედებულ რეგულაციას უკავშირდება, რომელმაც სამომხმარებლო სესხის ვადა 4-დან 3 წლამდე დაამოკლა.

იმ დროიდან მოყოლებული მომხმარებელმა იცოდა, რომ საკრედიტო ბარათი ერთადერთი გამონაკლისი იყო, რომლის ვადაც შენარჩუნდა.

და ბევრისთვის მოულოდნელი აღმოჩნდა ცვლილების ამოქმედება იმ დროს, როცა ბაზარი სამომხმარებლო სესხის ვადის ძველ ნიშნულზე დაბრუნებას ელოდება.

რეგულაციების შემსუბუქება და ეკონომიკისთვის დამატებით მუხტები, სებ-ის ფინანსური სტაბილურობის კომიტეტმა (ფსკ) ოთხშაბათის სხდომაზე უნდა განიხილოს.

საკრედიტო ბარათი ტოპ ქარდი არის რე/ბანკის შეთავაზება. რე/ბანკი კი „პაშა ბანკის“ ბრენდია, რომლითაც საცალო ბაზარზეა წარმოდგენილი.

ბანკი, აზერბაიჯანული კაპიტალით, სულ,  4 სერვის ცენტრით ოპერირებს. მ.შ. სამია რე/ბანკის, თბილისში, ბათუმსა და ქუთაისში. დედაქალაქის ცენტრალური ფილიალი (ზაარბრიუკენის მოედანზე) იურიდიულ პირებს ემსახურება.

01.10.2023 -ის მდგომაროებით, „პაშა ბანკის“ საბაზრო წილი, აქტივებით, 0.71%-ია. საცალო  და კორპორაციული დაკრედიტების ბაზარზე კი 0.67%-იან წილით არის წარმოდგენილი.

ამ დროისთვის ბანკში რეორგანიზაციაა. სექტემბერში ბანკი გენარალურმა დირექტორმა ნიკოლოზ შურღაიამ დატოვა, რომელსაც რამინ იმანოვი ცვლის. თუმცა ჯერ დამტკიცებული არ არის. სებ-ის დასტურს ელოდებიან.