ოთარ ნადარაია: ინფლაცია წელში მოტეხილია, ფასები აღარ იზრდება

ინფლაციას შემცირების ტენდენცია დაწყებული აქვს და ივნისში ან ივლისში მიზნობრივ 3%-იან მაჩვენებელს დაუბრუნდება - ამის შესახებ „თიბისი კაპიტალის“ მთავარი ეკონომისტი ოთარ ნადარაია აცხადებს.

"მიუხედავად იმისა, რომ ჯამურად, წლიური ინფლაცია მაღალია და წინა წლის თებერვალთან შედარებით 8.1%-ია, თვე-თვესთან შედარებით თუ შევხედავთ, ვნახავთ, რომ ინფლაცია უკვე მოტეხილია წელში, აღარ იზრდება ფასები.

რა თქმა უნდა, ეს ძირითადად იმპორტირებული პროდუქციის ხარჯზეა, რადგან საერთაშორისო სასაქონლო ფასები დაეცა. ასევე, მყარი ლარიც ბუნებრივია, თავის როლს ასრულებს. ეს პროცესი გაგრძელდება და იმპორტისა და ფასების შემცირების კუთხით კიდევ არის დარჩენილი შემცირების შესაძლებლობა“ - აცხადებს ნადარაია „ბიზნესპარტნირთან“.

მისივე თქმით, რაც შეეხება შიდა ფაქტორებს, ეკონომიკური აქტივობა კვლავ მაღალია, რაც ინფლაციის სწრაფად შემცირებას აფერხებს.

„რაც შეეხება ადგილბრივ კომპონენტს - მომსახურების და ბინის ქირის კუთხით, ინფლაციის შემცირებას უფრო მეტი დრო სჭირდება, რადგან ეკონომიკური აქტივობა საკმაოდ მაღალია და მოთხოვნა - ძლიერი. მიუხედავად ამისა, რასაც ვხედავთ, დისინფლაციის პროცესი იმპორტის კატეგორიაში აშკარაა. ცოტა უფრო მეტი დრო სჭირდება სხვა კომპონენტებს, თუმცა, ვერ ვიტყოდი რომ დრამატული ზრდაა სხვა კომპონენტებში. ჯამურად, აუცილებლად შემცირდება ინფლაცია. ვფიქრობთ, რომ ივნისში ან ივლისში არსებული 8.1% დაუბრუნდება მიზნობრივ ანუ 3%-იან მაჩვენებელს“ - აცხადებს ოთარ ნადარაია.