ნიკოლოზ გაგუა: კაპიტალის ბაზარზე პრობლემა არა ინვესტორთა, არამედ ემიტენტების სიმცირეა

საქართველოს კაპიტალის ბაზარზე პრობლემაა არა ინვესტორთა, არამედ ემიტენტების სიმცირე - განუცხადა „ბიზნესპარტნიორს“ ფინანსთა მინისტრის მოადგილემ, ნიკოლოზ გაგუამ და ამ კუთხით ბოლო პერიოდში მთავრობის ფასიანი ქაღალდების მიმართ უცხოელი ინვესტორების დაინტერესების ზრდაზე აღნიშნა.

ნიკოლოზ გაგუა მიიჩნევს, რომ აუცილებელია, როგორც თავის დროზე სხვა ქვეყნებში, კაპიტალის ბაზრის სტიმული მოხდეს, გარკვეულმა ღონიძიებებმა ბაზრის ამუშავება უნდა უზრუნველყოს, რაც ბაზრის ლიკვიდობას გაზრდის.

აღსანიშნავია, ბოლო პერიოდში გაიზარდა არარეზიდენტი ინვესტორების დაინტერესება სახაზინო ქაღალდების ბაზრით.

ეროვნული ბანკის მონაცემებით, ინვესტორების აქტიურობა გამოიხატება მათ მიერ პირველად და მეორად ბაზარზე ჩართულობაში, რომლის შედეგად მათ მფლობელობაში არსებული სახაზინო ფასიანი ქაღალდების პორტფელი 2019 განმავლობაში 6.3-ჯერ გაიზარდა და 378.3 მლნ ლარი შეადგინა.

მთლიანობაში, მთავრობის ვალის მართვის ერთ-ერთი სტრატეგიული მიმართულება სახაზინო ფასიანი ქაღალდების ბაზრის განვითარებაა.

ბაზრის განვითარებისთვის მთავრობა მიიჩნევს, რომ ფინანსთა სამინისტროსა და ინვესტორებს შორის უნდა გაჩნდნენ  შუამავლები (დილერები), რათა გაფართოვდეს ინვესტორთა ბაზა, გააქტიურდეს მეორადი ბაზარი.

ამ მიზნით, ფინანსთა სამინისტრო,  ეროვნულ ბანკთან ერთად, საერთაშორისო სავალუტო ფონდის და მსოფლიო ბანკის ტექნიკური დახმარებით, იწყებს პირველადი დილერების საპილოტე პროგრამის ამუშავებას.

პირველად დილერებს ექნებათ შუამავლის როლი ფასიანი ქაღალდების ემიტენტს (საქართველოს ფინანსთა სამინისტრო) და ინვესტორებს შორის. ასევე, იზრუნებენ ინვესტორთა ბაზის დივერსიფიკაციაზე და მეორადი ბაზრის ლიკვიდურობის ზრდაზე ფასების რეგულარული განახლებით, შესაბამისი სავაჭრო და საანგარიშსწორებო ინფრასტრუქტურის უზრუნველყოფით.