მთავრობა, ავტომობილის მფლობელთა მესამე პირის პასუხისმგებლობის დაზღვევას სავარაუდოდ, მომავალ კვირას განიხილავს
დაზღვევის ზედამხედველობის სამსახურის ხელმძღვანელის, დავით ონოფრიშვილის განცხადებით, მთავრობა, სავარაუდოდ, მომავალ კვირას განიხილავს ავტომობილის მფლობელთა მესამე პირის პასუხისმგებლობის დაზღვევას. შემდგომში კი ეს საკითხი გადაეცემა პარლამენტს, კანონის მისაღებად.
მისი ინფორმაციით, ავტომობილის მფლობელთა მესამე პირის პასუხისმგებლობის დაზღვევის ამოქმედებისთვის ბაზარი მზად არის.
„ბაზარი მზად არის. დღეს კანონით სავალდებულო არ არის ავტომობილის დაზღვევა, მაგრამ დაზღვევის მაჩვენებლები მზარდია. ადამიანები ხვდებიან, რომ ავტომობილის დაზღვევა საჭიროა იმისთვის, რომ არ მოუწიოთ დიდი ხარჯების გაწევა, რაც ოჯახს მძიმედ აწვება. ეს არის სწორედ დაზღვევა, რომ გარკვეული კონტრაქტის საფუძველზე, ყოველთვიური გადასახადით თავიდან ავიცილოთ დიდი ფინანსური ზარალი,“-აღნიშნა დავით ონოფრიშვილმა.
ცნობისთვის, სავალდებულო წესით ავტომფლობელთა მესამე პირის პასუხისმგებლობის დაზღვევის სახეობის შემოტანა ევროკავშირთან ასოცირების დღის წესრიგით ნაკისრი ერთ-ერთი ვალდებულებაა. კანონპროექტის პირვანდელი ვერსიის მიხედვით, სავალდებულო დაზღვევის ეს სახეობა 2024 წლიდან უნდა შევიდეს ძალაში.
