მიკროსაფინანსო ორგანიზაციების გაკოტრების პროცესი იცვლება
მიკროსაფინანსო ორგანიზაციების გაკოტრების პროცესი იცვლება, - საკანონმდებლო ცვლილებები პარლამენტმა საშემოდგომო სესიაზე უნდა განიხილოს.
ეროვნული ბანკი მიიჩნევს, რომ ფინანსური ინსტიტუტების ლიკვიდაციისა და გადახდისუუნარობის/გაკოტრების პროცესი სპეციფიკური ბუნებით ხასიათდება და მათი კრედიტორების ბუნებაც და რისკიანობაც განსხვავებულია.
ანალოგიური სპეციფიკური ბუნება ახასიათებს მიკროსაფინანსო ორგანიზაციებსაც, რის გამოც აუცილებელი ხდება მათი გადახდისუუნაროდ და გაკოტრებულად გამოცხადების გადაწყვეტილების მიღების უფლებამოსილება გააჩნდეს მხოლოდ ეროვნულ ბანკს.
საკანონმდებლო პაკეტით, საქართველოს ეროვნულ ბანკს ექნება შესაძლებლობა, განსაკუთრებულ შემთხვევაში, როდესაც მიკროსაფინანსო ორგანიზაციას არ გააჩნია თანხა ლიკვიდაციის ხარჯების დასაფარად, ეროვნულმა ბანკმა გასწიოს მიკროსაფინანსო ორგანიზაციის ლიკვიდაციის პროცესის შეუფერხებლად წარმართვისათვის აუცილებელი ხარჯი.
ცვლილებების შესაბამისად, ლიკვიდაციის პროცესში მყოფი მიკროსაფინანსო ორგანიზაციები გათავისუფლდებიან სასამართლო ბაჟის გადახდისგან დაუფარავი სესხების, სესხების პროცენტებისა და სხვა დებიტორული დავალიანებების დაბრუნებაზე აღძრულ ყველა სარჩელზე, რაც თავისმხრივ კრედიტორების ინტერესების დაცვისკენ არის მიმართული.
ამასთან, დაზუსტდება კრედიტორთა დაკმაყოფილების რიგითობა, დარეგულირდება ლიკვიდაციის დასრულების შემდეგ ამოღებული თანხების განკარგვის საკითხი.
მიკროსაფინანსო ორგანიზაციაში ლიკვიდაციის დაწყების თარიღიდან შეწყდება წინა პერიოდებში დაკისრებულ გადასახადებზე ჯარიმის/საურავის დარიცხვა, ასევე, კრედიტორთა გასტუმრების რიგითობის დაცვის მიზნით, მოწესრიგდება საგადასადახდო გირავნობით დატვირთული აქტივების რეალიზაციის საკითხები.
ამასთან, მიკროსაფინანსო ორგანიზაციისათვის დადგენილი ინვესტიციების კოეფიციენტის ლიმიტი შემზღუდველი ფაქტორი რომ არ აღმოჩნდეს მიკროსაფინანსო ორგანიზაციის მიერ საწარმოს წილის მიღებისას მის მიერ გაცემული კრედიტის თანხის ასანაზღაურებლად, ასეთ შემთხვევაში, საქართველოს ეროვნულ ბანკს ენიჭება უფლებამოსილება დაუწესოს მიკროსაფინანსო ორგანიზაციას გონივრული ვადა, არაუმეტეს 1 წელი, აღნიშნული ინვესტიციის შესამცირებლად/გასასხვისებლად/შესარწყმელად.
