MBC-ის დამფუძნებელი: ეროვნული ვალუტის ხშირი გაუფასურება მისო-ებს ხარჯებს უზრდის
2021 წელს მიკროსაფინსნო სექტორის ერთ-ერთ მთავარ გამოწვევაა არასტაბილური ლარია. ეროვნული ვალუტის ხშირი გაუფასურება მისო-ებს შემოსავლებს უმცირებს, ხარჯებს კი უზრდის.
„მთავარი პრობლემა ლარის სტაბილურობაა. მიკროსაფინანსო სექტორში ძალიან ბევრი პრობლემა ეროვნული ვალუტის მერყეობიდან მოდის. ჩვენ უცხოურ ვალუტაში სესხების გაცემის უფლება არ გვაქვს. მხოლოდ ლარშია დაკრედიტება. აქტივების ლომის წილი ლარში ნომინირებული პორტფელია, ხოლო მოზიდულ სახსრებში ძალიან დიდი წილი უცხოურ ვალუტაში მოზიდულ სესხებს უჭირავს. შესაბამისად, ლარის სწრაფი დევალვაცია ძალიან ბევრ პრობლემასა და მაღალ ხარჯებს იწვევს. ეს იყო მთავარი გამოწვევა გასულ წელს და მგონია, რომ წელსაც ასე დარჩება“,- აღნიშნა „ბიზნესპარტნიორთან“ მიკროსაფინანსო ორგანიზაცია MBC-ის დამფუძნებელმა, გია პეტრიაშვილმა.
ის არ ელოდება, რომ ეროვნული ვალუტა 2021 წელს სრულად დასტაბილურდება.
„ჩვენი ზომიერად ოპტიმისტური მოლოდინია, რომ ლარის დევალვაცია ისეთი მაღალი ხარისხის აღარ იქნება, როგორიც 2020 წელს იყო. თუმცა, რა თქმა უნდა, მის სრულად დასტაბილურებას 2021 წელს არ ველოდებით“,- განაცხადა მისო-ს დამფუძნებელმა.
