მაია მარქარაშვილი - მოსახლეობის 80% ფიქრობს, რომ "ფული იმისთვისაა, რომ დახარჯო" და "ხვალემ იზრუნოს ხვალისა"
ქართველი მოსახლეობის 80% დაზოგვასთან დაკავშირებით დებულებას ეთანხმება, რომ "ხვალემ იზრუნოს ხვალისა" და "ფული იმისთვის არის, რომ უნდა დავხარჯოთ,"- ამის შესახებ გადაცემა "ბიზნესპარტნიორთან" ეროვნული ბანკის ფინანსური განათლების განყოფილების უფროსმა, მაია მარქარაშვილმა განაცხადა.
"ქვეყანაში 2019 წელს ჩატარებული კვლევის შედეგად, რომელიც საერთაშორისო ორგანიზაცია OECD (Organisation for Economic Co-operation and Development) ხელშეწყობითა და მათი მეთოდოლოგიით განხორციელდა, დადგინდა, რომ ქვეყანაში დამოკიდებულების პრობლემაა, რომელიც ფინანსური დაზოგვის კომპონენტსაც მოიცავს,"-აცხადებს მარქარაშვილი.
მისივე მტკიცებით, საუკეთესო პრაქტიკების საფუძველზე, მოსწავლე-ახალგაზრდობის პერიოდი ის ასაკია, როდესაც ცოდნისა და დამოკიდებულებების ათვისება ყველაზე ადვილად ხდება, ვინაიდან მათი გონება ნეგატიური გამოცდილებებით დატვირთული არ არის.
საქართველოს ეროვნული ბანკი ფინანსური განათლების ეროვნული სტრატეგიის პროგრამის "მოიწვიე ფინედუ კლასში" ფარგლებში, ეროვნული ბანკის თანამშრომლები ან მათი პარტნიორების თანამშრომლები ბავშვებს დაზოგის მნიშვნელობაზე ინტერაქციულ ღია გაკვეთილს უტარებენ, ვინაიდან ზრდასრულ ასაკში ფინანსურ სიძნელეებს თავი მარტივად გაართვან.
ცნობისთვის, პროგრამა "მოიწვიე ფინედუ კლასში" 4 წელია აქტიურ რეჟიმში მიმდინარეობს, რომელიც წელიწადში ორჯერ მიმდინარეობს. 2023 წელს, პროგრამაში 300 კლასი და 6500 მოსწავლემდეა ჩართული. პროგრამა 31 ოქტომბერს დაიწყო და 17 ნოემბრამდე გაგრძელდება.
