ლაშა ნიკოლაძე: სადაზღვევო ბაზრის მოგება არათანაბრადაა გადანაწილებული, რაც გარკვეულ კითხვებს იწვევს

სადაზღვევო ბაზრის მოგება არათანაბრადაა  გადანაწილებული, რაც გარკვეულ კითხვებს იწვევს - რიგ კომპანიებს აქვთ მკვეთრად მაღალი მოგება, ხოლო კომპანიების უმეტესობა ზარალიანია. ამის შესახებ დაზღვევის კავშირის აღმასრულებელი მდივანი ლაშა ნიკოლაძე აცხადებს.

მისი თქმით, საბანკო ინვესტიციებით შექმნილი სადაზღვევო კომპანიების მოგება მნიშვნელოვნად მეტია, ხოლო არასაბანკო ინვესტიციით შექმნილი კომპანიები ჯამში ზარალიანები არიან.  თუმცა, ამასთანავე, მისი თქმით, ეს არ აისახება მომსახურების ხარისხზე და ის მთელი ბაზრის მასშტაბით მუდმივად იზრდება.

„გარკვეული დაფუძნების და ინვესტიციების კომპანიებს  ერთად აქვთ 40 მილიონის მოგება და სხვა ყველა დანარჩენს 1,8 მილიონის ზარალი, ეს რაღაცაზე მეტყველებს. ამაზე ჩვენ კონკურენციის სააგენტოშიც გვქონდა საუბარი და მათი მოკვლევაც დაწყებულია, კონკურენციის რამდენად სწორი ელემენტებია აქ გამოყენებული. იმ კომპანიებს, რომლებსაც პირდაპირ თუ ირიბად უკან ბანკები უდგას, აქვთ 40 მილიონი და სხვა ყველა, რომელთა რაოდენობაც ორჯერ მეტია, არის ზარალიანი,” - განმარტა ლაშა ნიკოლაძემ.

მისივე თქმით, სადაზღვევო კომპანიების ზარალიანობა მინიმალურ საზედამხედველო კაპიტალთან ჩამოსვლის პერსპექტივებსაც აჩენს.

„ზარალიანობამ გამოიწვია ის, რომ ან მკვეთრად ზარალიანი იყო კომპანია და შეუმცირდა საზედამხედველო კაპიტალი ან ვერ მოახერხა დაგენერირება იმ ნაწილში, რომ დაშორებულიყვნენ ამ მინიმალურ მაჩვენებელს,“- განაცხადა ლაშა ნიკოლაძემ.

ცნობისთვის: 2022 წლის მონაცემებით, საქართველოში მოქმედი  სადაზღვევო კომპანიების აქტივების ჯამური მოცულობა 1 105,5 მილიონ ლარს შეადგენს (წინა წელს იყო 985 მილიონი), ხოლო კაპიტალი 343,2 მილიონ ლარს - წინა წელს ეს მაჩვენებელი 324 მილიოი იყო.

2022 წლის 31 დეკემბრის მდგომარეობით საქართველოში რეგისტრირებულია 18 სადაზღვევო კომპანია, რომლებიც ფლობენ სიცოცხლის და არასიცოცხლის დაზღვევის ლიცენზიას.

2022 წლის განმავლობაში მოზიდულმა სადაზღვევო პრემიამ პირდაპირი დაზღვევის საქმიანობიდან შეადგინა 909,6 მილიონი ლარი (წინა წელს - 773 მილიონი). ამავე პერიოდის შედეგებით  მზღვეველების სადაზღვევო მოგებამ შეადგინა 210,3 მილიონი ლარი (წინა წელს იყო 172 მილიონი), წმინდა მოგებამ კი 39,2 მილიონი ლარი - წინა წელს ეს მონაცემი 40 მილიონ ლარს შეადგენდა, 2020-ში - 47.6 მილიონს.