ლაშა ხუციშვილი: საჯარო სექტორის ხელფასები გარკვეულ წესებზე უნდა დაფუძნდეს
ფინანსთა სამინისტროს 10 წლიანი გეგმის მიხედვით, ერთ-ერთი მნიშვნელოვანი მიმართულებაა ძლიერი საჯარო სექტორი. ფინანსთა მინისტრის ლაშა ხუციშვილის განცხადებით, ამის გარეშე ქვეყანაში მნიშვნელოვანი რეფორმები ვერ გატარდება.
მინისტრმა საჯარო სექტორში ხელფასების ზრდის საკითხზე ისაუბრა.
“ბოლო 5 წლის განმავლობაში ერთეული გამონაკლისების გარდა, ხელფასები იყო გაყინული, ზრდა არ განხორციელებულა, რაც საბოლოო ჯამში მიგვიყვანს იქამდე, რომ მნიშვნელოვნად დაეცემა საჯარო სექტორის კონკურენტუნარიანობა, შეფერხდება ის მნიშვნელოვანი რეფორმები, რომელიც ქვეყანაში ხორციელდება.
შესაბამისად, დისკუსიისთვის იყო გამოტანილი საკითხი, რომ საჯარო მოხელეების ხელფასები არ უნდა იყოს ყოველთვის გარკვეული პოლიტიკური სპეკულაციების საგანი, ეს უნდა იყოს ინდექსაციაზე, გარკვეულ წესებზე დაფუძნებული, რომ საჯარო სექტორში ერთის მხრივ მოწესრიგდეს ხელფასების საკითხი, მეორეს მხრივ ეს უნდა განხორციელდეს გარკვეული წესებით და ფორმულებით.
ჩვენ გვქონდა ანალოგიური სურათი პენსიებთან დაკავშირებით და ძალიან მნიშვნელოვნად მოხსნა პრობლემა პენსიების ინდექსაციის საკითხმა, რომელიც მიბმულია ეკონომიკურ ზრდაზე და ინფლაციაზე. შესაბამისად, გარკვეული წესები უნდა იყოს ჩამოყალიბებული და შეთანხმებული, იმისათვის, რომ აღნიშნული საკითხი არ გახდეს პოლიტიკური სპეკულაციის საგანი.
ამ მიმართულებით ჩენ ვხსნით დიალოგს და ვიწყებთ მუშაობას იმისთვის, რომ აღნიშნული საკითხი ერთხელ და სამუდამოდ მოგვარდეს“,- განაცხადა ლაშა ხუციშვილმა.
