ირაკლი კირტავა: მნიშვნელოვანია ვიცოდეთ საპენსიო სააგენტოსთან თანამშრომლობის პერსპექტივები
Galt&Taggart-ის დირექტორის, ირაკლი კირტავას აზრით, გარკვეული რეგულაციებია საჭირო, რითიც ნათელი იქნება, თუ რა ტიპის კომუნიკაციის დამყარებაა შესაძლებელი საპენსიო სააგენტოსა და საინვესტიციო ბანკებსა და სააბროკერო კომპანიებს შორის.
მისი თქმით, კანონმდებლობაში, რომელიც დღემდე არსებობს, ნორმატიულ აქტებსა და თავად კანონში არ არის ნახსენები თუ რა ტიპის სტანდარტული ურთიერთობები უნდა იყოს სააგენტოსა და საბროკერო კომპანიებს შორის.
„მნიშვნელოვანია, კარგად გვესმოდეს საბროკერო კომპანიებს, თუ რა პერსპექტივა გველის საპენსიო სააგენტოსთან თანამშრომლობის და კარგი იქნება, რომ მსგავს თემებზე იყოს უფრო ინტენსიური კომუნიკაცია, მათ შორის ეროვნული ბანკის და ეკონომიკის სამინისტროს ჩართულობით“, - განმარტავს Galt&Taggart-ის დირექტორი.
კირტავას განცხადებით, წლების განმავლობაში საპენსიო ფონდის ზრდასთან ერთად, მნიშვნელოვანია, რომ იზრდებოდეს დივერსიფიკაცია, რასაც სჭირდება ხელშეწყობა, როგორც ადგილობრივ ობლიგაციებში, ასევე შესაძლებელია საპენსიო სააგენტომ საერთაშორისო ბაზრებზეც მოახდინოს ინვესტირება.
იქამდე კი, მისი თქმით, როდესაც საპენსიო სააგენტოს მხოლოდ საბანკო პროდუქტების და სახაზინო ვალდებულებების საინვესტიციო პორტფელი აქვს, არ აქვს სალაპარკო აქტივების დივერსიფიაკაციასთან დაკავშირებით.
ამასთან დაკავშირებით კირტავამ დღეს, სასტუმრო რედისონ ბლუ ივერიაში, ბიზნეს ასოციაციის ორგანიზებით ჩატარებულ შეხვედრაზე ისაუბრა, სადაც საპენსიო სააგენტოს წარმომადგენლებსა და ბიზნეს სექტორს შორის დიალოგი გაიმართა.
შეხვედრის ფარგლებში ბიზნეს სექტორს საპენსიო სააგენტოს დირექტორმა გიორგი დანელიამ, საინვესტიციო ოფიცერმა გოგა მელიქიძემ და საინვესტიციო ოფიცრის მოადგილემ ლევან ვერძეულმა საპენსიო სააგენტოს საქმიანობა, მიღწევები, საინვესტიციო პოლიტიკა და სამომავლო გეგმები გააცნეს.
