გვენეტაძე: სანქციების არიდების მიზნით, ქართული საბანკო სექტორის გამოყენებას გამოვრიცხავ
ეროვნული ბანკის პრეზიდენტის განცხადებით, სანქციების თავიდან არიდების მიზნით, თუ ვინმე ქართული საბანკო სექტორის გამოყენებას შეეცდება, ის უმკაცრესად დაისჯება.
კობა გვენეტაძის თქმით, საფინანსო ინსტიტუტები ფულის გათეთრებისა და ტერორიზმის აღმოფხვრის ხელშეწყობის მიზნით საქართველოში არსებული კანონმდებლობის საფუძველზე რუსეთ-უკრაინის ომის დაწყებისა და რუსეთისთვის სანქციების დაწესების დღიდან აქტიურად მოქმედებენ.
"მიმდინარე კონფლიქტის ფონზე გაზრდილია რისკები არა მარტო იმ ქვეყნებში, სადაც ომი მიმდინარეობს, არამედ მთლიანად რეგიონში. თუმცა, ფულის გათეთრებისა და ტერორიზმის აღმოფხვრის ხელშეწყობის მიზნით საქართველოში არსებული კანონმდებლობის საფუძველზე კომერციულ ბანკებს შემუშავებული აქვთ თავიანთი პროცედურები, რომელიც უზრუნველყოფს, რომ ასეთი რისკების მატერიალიზება არ მოხდეს. კონფლიქტის დაწყებისთანავე, როდესაც სანქციები გამოქვეყნდა, ეროვნულმა ბანკმა მისცა მითითება მის ზედამხევდელობის ქვეშ მყოფ სუბიექტებს, რომ დაეცვათ ის სანქციები, რომელიც აამოქმედა აშშ-მ, ინგლისმა და ევროკავშირმა. ეს ნიშნავს, რომ საბანკო სექტორი განუხრელად იცავს ამ სანქციებს. არანაირი საფუძელი არ არსებობს იმისთვის, რომ ასეთი ეჭვები გაჩნდეს.
როგორც ბაზრის მონაწილეები, ასევე ეროვნული ბანკი განუხრელად იცავს იმ პრინციპებს, საერთაშორისო ნორმებსა და რეზოლუციებს, რაც საჭიროა გლობალური საფინანსო სისტემის ნაწილად ყოფნისთვის. ეროვნულ ბანკებს სანქციების შესრულების შესახებ მითითება დაუყოვნებლივ გაეგზავნათ. ამავე დროს ფინანსური სექტორის წარმომადგენლებს ცოცხალ რეჟიმში აქვთ წვდომა სანქცირებულ ფიზიკურ და იურიდიულ პირთა განახლებულ სიებზე.
სანქციების დაცვა გულისხმობს არა მხოლოდ ურთიერთობის შეწყვეტას სანქცირებულ პირებთან, არამედ მათთვის სხვა პირების მიერ საბანკო სექტორის მეშვეობით სანქციების არიდების ხელშეწყობის აღმოფხვრას. ქართული საბანკო სექტორის სანქციების არიდების მიზნით გამოყენებას აბსოლუტურად გამოვრიცხავ. ასეთი მცდელობაც კი მომენტალურად გამოვლინდება და მას მოჰყვება უმკაცრესი შესაბამისი რეაგირება",- განაცხადა გვენეტაძემ.
