გვენეტაძე: ყველაფერს ვაკეთებთ, რომ საზოგადოებას მაღალი ინფლაციის ტვირთი შევუმსუბუქოთ
პანდემია და რუსეთ-უკრაინის ომი - ამ ორ გამოწვევაზე საქართველოს ეროვნულმა ბანკმა და მსოფლიო ბანკმა ერთობლივ ღონისძიებაზე იმსჯელეს. საფინანსო ინსტიტუტმა 2022 წლის „გლობალური ეკონომიკური პერსპექტივების” ანგარიში წარადგინა.
"ჩვენ ვხედავთ, რომ მაღალი ინფლაციის პრობლემა განვითარებულ ქვეყნებშიც მწვავედ დგას. დღეს ჩვენ ორი კრიზისის წინაშე ვდგავართ - პანდემია და ომი. პირველად მრავალი წლის განმავლობაში, ინფლაცია გახდა აშკარა საფრთხე მსოფლიოს მრავალი ქვეყნისთვის. საქართველოს, როგორც მცირე ზომის ღია ეკონომიკის მქონე ქვეყანას, არაერთ გამოწვევასთან ერთდროულად გამკლავება უწევს, რაც საბოლოო ჯამში ფასებზე აისახება", - განაცხადა კობა გვენეტაძემ. გამოწვევებზე საპასუხოდ, მისი თქმით, განმარტავს, რომ სებ-ის პროფესიონალებით დაკომპლექტებულმა გუნდმა გაატარა ადეკვატური ღონისძიებები. "სებ-ი ყველაფერს აკეთებს, რომ ეს ტვირთი საზოგადოებას შევუმსუბუქოთ. რომ არა ეროვნული ბანკის თანმიმდევრული და დროული ნაბიჯები, რასაც არაერთი საერთაშორისო ორგანიზაცია ადასტურებს, დღეს გაცილებით უფრო ცუდ მდგომარეობაში ვიქნებოდით", - განაცხადა კობა გვენეტაძემ.
იქვე ნათქვამია როგორ აფერხებენ ენერგორესურსების ბაზრებზე ომით გამოწვეული შედეგები გლობალური ზრდის პერსპექტივას. უკრაინაში მიმდინარე ომმა ენერგორესურსებთან დაკავშირებული საქონლის ფართო სპექტრისთვის ფასების ზრდა განაპირობა. მაღალი ფასები ენერგორესურსებზე შეამცირებს რეალურ შემოსავალს, გაზრდის საწარმოო ხარჯებს, გაამკაცრებს ფინანსურ პირობებს და შეზღუდავს მაკროეკონომიკურ პოლიტიკას - განსაკუთრებით ენერგორესურსების იმპორტიორ ქვეყნებში.
