ფულადი გზავნილების შემოდინება 30-35%-ით გაზრდილია - რიკო კრედიტი
ფულადი გზავნილები თითქმის ყველა კორიდორზე 30-35%-ით გაზრდილია, - განაცხადა „ბიზნესპარტნიორთან“ მიკროსაფინანსო ორგანიზაცია „რიკო კრედიტის” სამეთვალყურეო საბჭოს თავმჯდომარემ. მისი განმარტებით, მიუხედავად იმისა, რომ მსოფლიოს მასშტაბით საუბარია პანდემიის მეორე ეტაპზე, მოლოდინებიც დადებითია.
„იმედი მაქვს, ოქტომბერში ვაქცინა უკვე იქნება და პანდემიის ბოლოში გავალთ,“ - აცხადებს ლაშა ნიკოლაიშვილი.
ეროვნული ბანკის მონაცემებით, 2020 წლის ივნისში ქვეყანაში შემოსული ფულადი გზავნილების ნაკადების მოცულობამ 169.2 მლნ აშშ დოლარი (514.8 მლნ ლარი) შეადგინა, რაც 17.8%-ით (25.6 მლნ აშშ დოლარით) მეტია 2019 წლის ივნისის ანალოგიურ მაჩვენებელზე.
უცხოეთიდან საქართველოში ფულადი გზავნილების 94.5% იმ 18 უმსხვილეს პარტნიორ ქვეყანაზე მოდის, საიდანაც ასეთი გზავნილების მოცულობამ ივნისში 1 მლნ აშშ დოლარს გადააჭარბა. იმავე 18 ქვეყანაზე გასული წლის ივნისში მთელი ფულადი გზავნილების 93.2% მოდიოდა.
2020 წლის ივნისში საქართველოდან საზღვარგარეთ 21.9 მლნ აშშ დოლარი (66.6 მლნ ლარი) გადაიგზავნა, რაც 2019 წლის ივნისის (17.5 მლნ აშშ დოლარი) ანალოგიურ მაჩვენებელთან შედარებით 25.4%-ით მეტია.
