დეპუტატი სებ-ს: კორონას დროს თქვენმა პოლიტიკამ მოქალაქეებს დახმარების მიღებაში ხელი შეუშალა
"გირჩის" წევრი, ოპოზიციონერი დეპუტატი ვახტანგ მეგრელიშვილი ეროვნულ ბანკს საერთაშორისო ორგანიზაციებიდან მიღებული დახმარების არაგონივრულად გამოყენებაში ადანაშაულებს.
"პანდემიის დროს უცხოელები რომ დაგვეხმარნენ, დოლარები გამოგვიგზავნეს, მე ასე მესმის - მე რომ ავიღო ეს დოლარი, შემიძლია წავიდე და რაღაც ვიყიდო, ახალი პროდუქტი ვიყიდო ამ ფულით, რომელიც არ მქონდა მანამდე. თქვენ რომ დაარეზერვეთ, ახალი ლარები დაბეჭდეთ, ეს რანაირი დახმარებაა? ანუ დახმარება როგორ უნდა მიმეღო? ფაქტობრივად, ეს ფული, რაც დაგვეხმარნენ, რეზერვებში გაქვთ დადებული. კითხვა მაქვს, გამოვიყენეთ ეს ფული დასახმარებლად? თქვენი რეზერვი როგორ ნიშნავს დახმარებას? თქვენმა პოლიტიკამ, კორონას დროს, საქართველოს მოქალაქეებს ხელი შეუშალა იმ დახმარების მიღებაში, რომელიც ჩვენმა უცხოელმა მეგობრებმა მოგვცეს. მხოლოდ იმიტომ, რომ ეს ფული თქვენ დაარეზერვეთ, ნაცვლად იმისა, რომ ამით მაგალითად გეყიდათ ლარები", - მიმართა ვახტანგ მეგრელიშვილმა სებ-ის პრეზიდენტს კობა გვენეტაძეს პარლამენტში პლენარულ სხდომაზე.
