ბანკებმა დაკრედიტება შეამცირეს

ბანკებმა ივნისში დაკრედიტება შეამცირეს. მაისთან შდარებით, სებ-ის მონაცემებით, გაცემული სესხების მოცულობა 383.61 მლნ ლარით (1.12%-ით) შემცირდა (გაცვლითი კურსის ეფექტის გარეშე, 0.79%-ით გაიზარდა) და 1-ელი ივლისისათვის 33.80 მლრდ ლარია.

საანგარიშო პერიოდში ეროვნული ვალუტით გაცემული სესხების მოცულობა 195.12 მლნ ლარით (1.36%-ით) გაიზარდა, უცხოური ვალუტით გაცემული სესხების მოცულობა კი 578.73 მლნ ლარით (2.91%-ით) შემცირდა (გაცვლითი კურსის ეფექტის გარეშე, გაიზარდა 0.38%-ით).

რეზიდენტი იურიდიული პირებისათვის 2020 წლის ივნისის ბოლოს კომერციულ ბანკებს ეროვნული ვალუტით გაცემული ჰქონდათ 4.46 მლრდ ლარის (წინა თვესთან შედარებით 0.28%-ით მეტი), უცხოური ვალუტით კი 11.82 მლრდ ლარის (წინა თვესთან შედარებით 2.91%-ით ნაკლები) სესხი (გაცვლითი კურსის ეფექტის გარეშე, 0.37%-ით მეტი).

2020 წლის ივნისში 0.06%-ით, ანუ 9.39 მლნ ლარით შემცირდა რეზიდენტი შინამეურნეობების სექტორის დაკრედიტების მოცულობა და მიმდინარე წლის პირველი ივლისისათვის 16.71 მლრდ ლარი შეადგინა.

მიმდინარე წლის პირველი ივლისისათვის მთლიანი სესხების ლარიზაციის კოეფიციენტმა 42.91% შეადგინა. 2020 წლის 1-ელი ივნისის მდგომარეობასთან შედარებით, მთლიანი სესხების ლარიზაცია გაიზარდა 1.05 პროცენტული პუნქტით (გაცვლითი კურსის ეფექტის გამორიცხვით, გაიზარდა 0.24 პროცენტული პუნქტით).