"ავტოავარიისას დაზიანებული ჯანმრთელობის ანაზღაურებაზე თანხა ბიუჯეტიდან არ უნდა იფლანგებოდეს"
სადაზღვევო კომპანია "გლობალ ბენეფიტს ჯორჯიას" გენერალური დირექტორი ავტომფლობელთა სამოქალაქო პასუხისმგებლობის სავალდებულო დაზღვევის ამოქმედების აუცილებლობაზე მიათითებს. ნინა კობახიძე "ბიზნესპარტნიორთან" ამბობს, რომ საქართველო ამ მხრივ მსოფლიოში ერთადერთი ჩამორჩენილი ქვეყანაა.
გარდა ამისა, სახელმწიფო ბიუჯეტიდან დიდი თანხა იფლანგება ავტომანქანების მიერ დაზიანებული ჯანმრთელობის და სიცოცხლის ანაზღაურებაზე, შესაბამისად, კანონპროექტის მიღება კი ამ პრობლემას მოაგვარებს.
„ევროკავშირი ამაზე ბევრი წელია მიგვითითებს, ასოცირების ხელშეკრულებითაც ვალდებულება გვაქვს. ამასთანავე იმედი გვაქვს, რომ ავტომფლობელთა სამოქალაქო პასუხისმგებლობის სავალდებულო დაზღვევის ამოქმედების შემდეგ, საცალო ბაზარი ნელ-ნელა გამოცოცხლებას დაიწყებს", - განმარტავს ნინა კობახიძე.
მესამე პირის მიმართ პასუხისმგებლობის დაზღვევის დროს დაზღვეულის სამართლებრივი პასუხისმგებლობაა აუნაზღაუროს მესამე მხარეს ქონების/ჯანმრთელობისათვის მიყენებული ზიანისათვის დაზღვეული ავტომობილის მართვისას.
კანონპროექტი 2 წელია პარლამენტშია და სხვადასხვა მიზეზით მისი მიღება ვერ მოხერხდა. სადაზღვევო ინდუსტრია ხელშემშლელ ფაქტორებში კოვიდ პანდემიას ასახელებს. თუმცა, სექტორი მიმდინარე წლის დასაწყისში იმედოვნებდა, რომ მესამე პირის სავალდებულო ავტოდაზღვევის კანონმდებლობის მიღებას პარლამენტი წელს მაინც შეძლებდა.
