არჩილ მესტვირიშვილი: დოლარიზაცია ისევ მაღალი რჩება
ეროვნული ბანკის ვიცე-პრეზიდენტის არჩილ მესტვირიშვილის შეფასებით, მიუხედავად იმისა, რომ დოლარიზაციას 2021 წელს შემცირების ტრენდი ჰქონდა, ის ისევ მაღალი რჩება.
"დოლარიზაცია ერთ-ერთი მნიშვნელოვანი პრობლემაა, როგორც ქვეყნის მდგრადი ეკონომიკური ზრდისათვის და საგარეო შოკებისადმი მოწყვლადობის კუთხით, ისე მსესხებლების კუთხით.
დოლარიზაციას 2021 წელს შემცირების ტრენდი ჰქონდა, თუმცა ის ისევ მაღალი რჩება. სესხების ნახევარზე მეტი ახლა უკვე საბანკო სექტორში ლარით არის დენომინირებული. ფიზიკური პირებისათვის გასული წლის ბოლოს, დოლარიზაციის მაჩვენებელი 37% იყო, წელს გაუმჯობესების ტენდენცია გრძელდება, თუმცა ის ისევ მაღალია.
ჩვენ დამატებითი ზომები გავატარეთ დოლარიზაციის შემცირების ხელშეწყობისათვის. სარეზერვო მოთხოვნები გავხადეთ დიფერენცირებული, გარდა ამისა შემოვიღეთ ე.წ. არაჰეჯირებული სავალუტო საკრედიტო რისკის ბუფერის დიფერენცირებული კოეფიციენტი.
სულ გასული წლის ბოლოს საკრედიტო პორტფელი 43 მლრდ ლარი იყო. კურსისი ეფექტის გამორიცხვით, 18%-იანი ზრდაა და მშპ-სთან 71.4 %-ია ფარდობა", - განაცხადა არჩილ მესტვირიშვილმა დარგობრივი ეკონომიკისა და ეკონომიკური პოლიტიკის კომიტეტის სხდომაზე.
