არჩილ გაჩეჩილაძე: საბანკო სექტორი გაზრდილი მოთხოვნების დასაკმაყოფილებლად მზად არის

„საქართველოს ბანკის“ გენერალური დირექტორი არჩილ გაჩეჩილაძე გადაცემა „ბიზნესპარტნიორის ოთხეულთან“ აცხადებს, რომ საბანკო სექტორის საქმეა იყოს გამტარი და ეფექტურად მიაწოდოს იმ სექტორებს ჟანგბადი და სისხლი, რომლებსაც ეს სჭირდებათ.

კითხვაზე, მზად არის თუ არა საბანკო სისტემა გაზრდილი მოთხოვნების დასაკმაყოფილებლად, გაჩეჩილაძე აცხადებს, რომ 2020 წლის სირთულეების მიუხედავად, მზად არის - საბანკო სექტორში კაპიტალის მოცულობა და ლიკვიდურობა მყარია.

„ჩვენგან აბსოლუტური მზაობაა, რომ დავეხმაროთ ყველა სექტორს და ჩვენი ფუნქცია შევასრულოთ იმ მომენტშივე, როგორც კი ჩვენი ეკონომიკა გადაწყვეტს, სწრაფი ნაბიჯით სვლას,“ - აცხადებს გაჩეჩილაძე.

შეგახსენებთ, რომ 2020 წელი საბანკო სექტორმა პანდემიით გამოწვეული პრობლემების მიუხედავად 99.2 მლნ ლარის მოგებით (კონსოლიდირებული) დაასრულა. ბაზარზე წარმოდგენილი 15 ბანკიდან 7 მოგებაზე (206 მლნ ლარი) გავიდა.

აღსანიშნავია, რომ სექტორს ყველაზე მოცულობითი, 1 მლრდ-მდე, 943 მლნ ლარის ზარალი ჰქონდა მარტში, პანდემიის დარტყმისას, სებ-მა ნამეტი რეზერვის შექმნა რომ დაავალდებულა.