6 თვეში სადაზღვევო კომპანიებმა სოფლის მეურნეობის სექტორში ₾86 000-მდე ზარალი აანაზღაურეს
აგროდაზღვევის სახელმწიფო პროგრამაში ბაზარზე არსებული 18 სადაზღვევო კომპანიიდან, ოთხია ჩართული.
დაზღვევის სახელმწიფო ზედამხედველობის სამსახურის მონაცემებით, 2023 წლის პირველი ექვსი თვის მაჩვენებლებით, აგროდაზღვევის პოლისებს ყველაზე აქტიურად ალდაგი ყიდის. პროგრამაში ასევე ჩართულია თიბისი დაზღვევა, ნიუ ვიჟენ დაზღვევა და პრაიმი.
2023 წლის პირველ ექვს თვეში რისკების მზღვეველებმა სოფლის მეურნეობის სექტორში 86 ათას ლარამდე დამდგარი ზარალი აანაზღაურეს, საიდანაც 25 ათას ლარზე მეტი აგროდაზღვევის სახელმწიფო პროგრამის ფარგლებში ანაზღაურდა.
ცნობისთვის, ფერმერს აქვს შესაძლებლობა მოსავალი ისეთი სტიქიური მოვლენებისგან დააზღვიოს, როგორებიცაა: სეტყვა, წყალდიდობა, ქარიშხალი და საშემოდგომო ყინვები. აგროდაზღვევის პროგრამაში ჩართული ყველა ფერმერი 70%-იან თანადაფინანსებას იღებს პროგრამით გათვალისწინებულ ყველა კულტურაზე, მათ შორის, ვაზზე. პროგრამის ფარგლებში, ბენეფიციარს შეუძლია დააზღვიოს 10 ჰა -მდე მიწის ნაკვეთი, ხოლო მარცვლეული კულტურის შემთხვევაში 50 ჰექტარი. ამასთან, დამზღვევს შესაძლებელია დაზღვეული ჰქონდეს როგორც მარცვლეული კულტურა, ისე სხვა კულტურები ერთდროულად.
