ვინ განკარგავს რიონის ხეობის განვითარების 5 მლნ-იან ფონდს - ნათია თურნავას განმარტება
ვინ განკარაგს რიონის განვითარების 5 მლნ-იან ფონდს, რომლის შექმნაც ეკონომიკის მინისტრმა რამდენიმე დღის წინ ნამახვანი ჰესის მშენებლობასთან დაკავშირებით ადგილობრივებთან და დაინტერესებულ პირებთან შეხვედრაზე დაანონსა.
დეტალებზე ნათია თურნავამ საზოგადოებრივი მაუწყებლის ეთერში დეტალებზე ისაუბრა და აღნიშნა, რომ ეს იქნება არა მხოლოდ ინვესტორის პასუხისმგებლობა, არამედ სახელმწიფოც მზადაა, ფონდში შევიდეს.
"5 მლნ ლარი პირობითი თანხაა და ყველაფერი დამოკიდებულია იმაზე, თუ რა პროექტები დაიგეგმება,“ - განაცხადა მინისტრმა.
მისი თქმით, მსგავსი ფონდის ჩამოყალიბების კარგი გამოცდილება „ბიპის“ ჰქონდა, როდესაც ბაქო - ჯეიჰანის მილსადენი შენდებოდა.
ნათია თურნავას განცხადებით, ფონდის განმკარგველი იქნება სათემო ორგანიზაციები, ადგილობრივი მოსახლეობის ნდობით აღჭურვილი წარმომადგენლები და შედგება პრიორიტეტული პროექტების ნუსხა.
„ეს შეიძლება იყოს სოციალური ობიექტები, როგორიცაა საბავშვო ბაღი ან სოფლის ამბულატორია, ან დაფინანსდეს სკოლის რემონტი ან ახალი სასწავლებლის აშენება. როდესაც ჰესები შენდება, ადგილობრივი მოსახლეობის პრიორიტეტებშია სარიტუალო დარბაზების მშენებლობაც. შეიძლება ეს იყოს ინფრასტრუქტურული პროექტები - წყალმომარაგება და სოფლის გზები აქტუალური თემაა. მართალია, ჩვენ ბევრს ვაშენებთ, მაგრამ ვფიქრობთ, რომ ინვესტორმაც უნდა იკისროს თავისი წილი პასუხისმგებლობა. შესაძლოა, ეს იყოს ელექტროენერგიის საფასურის სუბსიდირება ხანგრძლივი დროით. აქედან გამომდინარე, როდესაც პროექტები ჩამოყალიბდება და შეფასდება, შეიძლება ეს თანხა გაიზარდოს,“ - განაცხადა ნათია თურნავამ.
მინისტრმა ასევე გაამახვილა ყურადღება ქონების გადასახადზე, რომელსაც ინვესტორი კომპანია ადგილობრივ ბიუჯეტში გადაიხდის. „ამ 4 წლის განმავლობაში ადგილობრივ ბიუჯეტში 120 მლნ დოლარის ქონების გადასახადი შევა. ჩვენ შევთანხმდებით ადგილობრივ თვითმმართველობებთან, რომ ამ თანხის გარკვეული ნაწილი აუცილებლად მოხმარდეს იმ სოფლებს, რომლებიც ხეობაში მდებარეობს,“ - განაცხადა ნათია თურნავამ.
სატელევიზიო ინტერვიუში მინისტრმა ზემო სვანეთის რეგიონის მაგალითი მოიყვანა. მისი თქმით, დიდი ჰესების წინააღმდეგ ამ მხარეშიც გამოდიოდა მოსახლეობა, მაგრამ სწორი კომუნიკაციისა და ცენტრალური და ადგილობრივი მთავრობების ჩართულობით ეს საკითხი მოგვარდა. „დღეს ზემო სვანეთი მეორე ადგილასაა საქართველოს რეგიონებს შორის მცირე და საშუალო ჰესების ოდენობით. ჰესების მშენებლობამდე ადგილობრივი ბიუჯეტი 500,000 ლარი იყო. ჰესების შედეგად შესული ქონების გადასახადით ეს მაჩვენებელი 10 მლნ ლარამდე გაიზარდა. მესტია დღეს მსოფლიო ტურისტულ რუკაზე ერთ-ერთი მიზიდულობის ცენტრი რომ არის, მათ შორის, ამ გადასახადის დამსახურებაცაა. ამდენად, ნებისმიერი პროექტი შეგიძლია ადგილობრივი მოსახლეობის სასიკეთოდ მიატრიალო,“ - განაცხადა მინისტრმა.
