სემეკი სიმულაციური ვაჭრობის მონაწილეებს აფრთხილებს
საქართველოს ენერგეტიკისა და წყალმომარაგების მარეგულირებელი ეროვნული კომისია ელექტროენერგიის ბაზრის სიმულაციური ვაჭრობის მონაწილეებს აფრთხილებს.
სემეკის გადაწგვეტულებით, ელექტროენერგიის ბაზარზე სიმულაციური ვაჭრობისას კანონმდებლობით განსაზღვრული მოთხოვნების შეუსრულებლობის შემთხვევაში, ბაზრის მონაწილეები ინდივიდუალურად დაჯარიმდებიან.
გადაწყვეტილება სემეკმა საჯარო სხდომაზე სემეკის აპარატის, საქართველოს ენერგეტიკული ბირჟის, ელექტროენერგიის საბალანსო და დამხმარე მომსახურების ბაზრის ოპერატორის ანგარიშების მოსმენის საფუძველზე მიიღო.
კომისიის გადაწყვეტილებით, ბაზრის ოპერატორებს 14 თებერვლამდე 6-12 თებერვლის სიმულაციური ვაჭრობის მონაცემების წარდგენა დაევალათ.
გარდა ამისა, ელექტროენერგიის გადამცემი სისტემის ოპერატორს 7 თებერვლამდე განესაზღვრა ვადა მასთან რეგისტრირებული პირდაპირი ხელშეკრულებების კომისიისთვის მისაწოდებლად.
როგორც სემეკში განმარტავენ, ელექტროენერგეტიკული კომპანიებისათვის კანონმდებლობით გათვალისწინებული ვალდებულებაა საქართველოს ენერგეტიკული ბირჟის, ელექტროენერგიის საბალანსო და დამხმარე მომსახურების ბაზრის ოპერატორის მიერ ორგანიზებულ სიმულაციურ ვაჭრობაში მონაწილეობის მიღება - ბაზრის მონაწილემ სავაჭრო/სატენდერო განაცხადები უნდა განათავსოს ელექტროენერგიის წარმოების/მოხმარების რეალური გეგმების შესაბამისად.
