"საქკაბელის" საწარმოზე მზის პანელები დამონტაჟდა
ზესტაფონში, "საქკაბელის" საწარმოში შემავალი შენობების სახურავებზე, თიბისის მხარდაჭერით, მზის პანელები დამონტაჟდა.
500 კვტ დადგმული სიმძლავრის მქონე მზის ელექტროსადგური, კომპანია „ჰელიოს ენერჯიმ“ დაამონტაჟა.
პროექტი ნეტო-აღრიცხვის პროგრამაშია ჩართული. სადგურის გენერაცია პირდაპირ საწარმოო პროცესს ხმარდება და ქსელიდან იმპორტირებული ენერგიის წილს ანაცვლებს. მზის ელექტროსადგურისგან მიღებული ენერგია საწარმოს ჯამური წლიური მოხმარების 1/3-ს ფარავს. შესაბამისად, ნეტო-აღრიცხვის პროგრამა საგრძნობლად ამცირებს ელექტროენერგიაზე წლიურ დანახარჯებს.
პროექტში გამოყენებულია Tier 1-ის რეიტინგში შემავალი კომპანიის - Hanwha Q Cells-ის მონოკრისტალური ტიპის მზის პანელები. აღნიშნული ბრენდი მსოფლიოში პანელების მწარმოებელთა შორის ერთ-ერთი საუკეთესოა. ასევე, პროექტში გამოყენებულია კომპანია Huawei-ს ინვერტერები.
კომპანიის წარმომადგენელი ამბობს, რომ მომავალში ,,საქკაბელი” კიდევ ბევრ ეკო-გადაწყვეტილებებს,სიახლეებს და ინოვაციებს შესთავაზებს მომავალ და უკვე არსებულ ერთგულ მომხმარებლებს.
