ოლივერ ვარჰეი: ევროკავშირი-საქართველოს წყალქვეშა კაბელში €2.3 მლრდ-ის ინვესტირება იგეგმება
ევროკავშირი შავ ზღვის კაბელის პროექტის განხორციელებაში ინვესტირებას განიხილავს, - განაცხადა ევროკავშირის სამეზობლო და გაფართოების საკითხებში ევროკომისარმა ოლივერ ვარჰეიმ.
EU Global Gateway Board-ის შეხვედრაზე სწორედ ეს პროექტი განიხილეს. ამ ეტაპზე აღნიშნულ პროექტში 2.3 მილიარდი ევროს ინვესტირება იგეგმება.
აღმოსავლეთის პარტნიორობის ფარგლებში ინფრასტრუქტურულ-ენერგეტიკულ პროექტებში ინვესტირების საკითხები განიხილა ევროკავშირის უმაღლესმა წარმომადგენლობითმა საბჭომ, რომელსაც კომისიის პრეზიდენტი ურსულა ფონ დერ ლაიენი, ჯოზეფ ბორელი და ევროკომისარი ოლივერ ვარჰეი ხელმძღვანელობდა.
შავი ზღვის წყალქვეშა კაბელის პროექტი წყალქვეშა მაღალი ძაბვის გადამცემი ქსელის მოწყობას ითვალისწინებს, რომელმაც ერთმანეთთან საქართველოსა და ევროპის ელექტროენერგეტიკული სისტემები უნდა დააკავშიროს.
