ნათია თურნავა: არ გვექნება ელექტროენერგია, არ გვეყოლება ტურისტი
ეკონომიკის მინისტრის განცხადებით, ენერგეტიკისა და ტურიზმის სექტორები ერთმანეთთან მჭიდრო კავშირშია. ნათია თურნავას რწმუნებით, ტურიზმის აღდგენა ენერგეტიკის ზრდას შეუწყობს ხელს.
„ზოგჯერ ამ ორს ერთმანეთს უპირისპირებენ ხოლმე, მაგრამ, რა თქმა უნდა, ეს ასე არ არის. ის, რომ დღეს სეზონურობის თვალსაზრისით მოხმარებაში ორი, ზამთრისა და ზაფხულის პიკი გვაქვს, ეს სწორედ ტურიზმის დამსახურებაა. იმდენად განვითარდა ტურიზმი, რომ მოთხოვნა კონდიცირებაზე, იგივე სასტუმროებში, ძალიან მაღალია. თუ ეკონომიკური ზრდა იქნება 5% და ამაში ეჭვი არ გვეპარება, მანდ ერთ-ერთ გამწევ როლს აღდგენადი ტურიზმი შეასრულებს. ის განაპირობებს ენერგეტიკის 3.5%-იან ზრდას. ერთი მეორეს გარეშე შეუძლებელია. არ გვექნება ელექტროენერგია, არ გვეყოლება ტურისტი. ეს ერთმანეთთან მჭიდრო კავშირშია“,- განაცხადა თურნავამ.
ცნობისთვის, საკანონმდებლო ორგანოში ნამახვანი ჰესის მშენებლობასთან დაკავშირებით ეკონომიკისა და სოფლის მეურნეობის მინისტრებს უსმენენ. სხდომას ესწრებიან ადგილობრივებიც.
