მურმან მარგველაშვილი: ენერგობაზრის ლიბერალიზაცია ხელს უწყობს კონკურენციას
ენერგეტიკის დარგის სპეციალისტები ბაზრის ლიბერალიზაციის მნიშვნელობაზე საუბრობენ. ანალიტიკური ცენტრის „მსოფლიოს გამოცდილება საქართველოსთვის“ დამფუძნებელი, მურმან მარგველაშვილი მიიჩნევს, რომ ლიბერალიზაციის პროცესი ერთი მხრივ, კონკურენტული გარემოს ჩამოყალიბებას შეუწყობს ხელს, ეს კი თავის მხრივ ფასთა ცვლილებაზე დადებითად აისახება.
„ენერგეტიკული ბაზრის ლიბერალიზაცია ერთი მხირვ უწყობს ხელს კონკურენციას, კონკურენცია კი ამცირებს ღირებულებებს, აუმჯობესებს ხარისხს და ეს მომხმარებლისა და მთლიანად ენერგო სექტორისთვის დადებითი მოვლენაა. მეორე, ეს არის გამჭვირვალე გარემო, რომელიც სტაბილურობის უფრო მეტ შეგრძნებას აჩენს. ინვესტორებს უჩნდებათ იმის შეგრძნება, თუ როგორი ტენდენციები და წესები იქნება ბაზარზე. თუ ეს სტაბილური გარემო იქნება, ის ხელს შეუწყობს ინვესტიციების ზრდას და შესაბამისად, მთელი სექტორის განვითარებას.
რეფორმა უნდა დაჩქარდეს და ბოლომდე უნდა მივიდეს. ეს მთავარი პრინციპები - ღია კონკურენცია, ბაზარზე თავისუფლად შემოსვლის პირობები და ქსელზე თავისუფალი დაშვება იყოს დაცული“,- განმარტა ენერგეტიკოსმა.
