"მომხმარებლებისთვის, ძველი მრიცხველების ჭკვიანი მრიცხველებით ჩანაცვლება უფასო იქნება"
"მომხმარებლებისთვის, ძველი მრიცხველების ჭკვიანი მრიცხველებით ჩანაცვლება უფასო იქნება და მათ თანხის დამატება ან გადახდა არ მოუწევთ,“ - ამის შესახებ გადაცემა „ბიზნესი რუსთავის 2-ს“ საქართველოს ენერგეტიკისა და წყალმომარაგების ეროვნული კომისიის (სემეკი) თავმჯდომარე, დავით ნარმანიამ განუცხადა.
მისი ინფორმაციით, კომისიის გადაწყვეტილების საფუძველზე, 2021 წლის 1 ოქტომბრიდან აშენებულ და ექსპლუატაციაში შესულ ყველა კორპუსზე, ელექტროენერგიის მხოლოდ ჭკვიანი მრიცხველი განთავსდება.
ჭკვიანი მრიცხველი კი მომხმარებელს საშუალებას მისცემს საკუთარ მრიცხველზე ნებისმიერ დროს მონიტორინგი აწარმოოს.
„რაც შეეხება კიდევ უფრო ადრე აშენებულ საცხოვრებელ კორპუსებსა თუ საცხოვრებელ სახლებს, ამ შემთხვევაში მრიცხველების ეტაპობრივი ჩანაცვლება მოხდება. ხოლო მიკროსიმძლავრის სადგურების შემთხვევაში, იქ აუცილებლად ჭკვიანი მრიცხველები უნდა დადგეს.“-აცხადებს ნარმანია.
საქართველოს ენერგეტიკისა და წყალმომარაგების ეროვნული კომისიის თავმჯდომარის თქმით, მარეგულირებელი ახალ პლატფორმებს ავითარებს და ახალ მიდგომებს მუდმივად ნერგავს.
ცნობისთვის, ენერგეტიკის სექტორში დიჯიტალიზაციის პროცესი უკვე რამდენიმე წელია დაიწყო. სერვისების მისაწვდომობასა და სტანდარტიზაციასთან ერთად, დიჯიტალიზაცია მოიცავს მთლიანი სექტორის გაციფრულებასა და კიბერუსაფრთხოების გაძლიერებას, რაც ენერგოუსაფრთხოების გაუმჯობესებას ხელს შეუწყობს.
