ილჰამ ალიევი საქართველოს გავლით გაზისა და ელექტროენერგიის ექსპორტის ზრდას გეგმავს

მომდევნო ხუთი წლის განმავლობაში აზერბაიჯანი აპირებს, გააორმაგოს ბუნებრივი აირის ექსპორტი ევროპის მიმართულებით და ბაქო-სუფსის მილსადენი დატვირთოს, - ამის შესახებ აზერბაიჯანის პრეზიდენტმა ილჰამ ალიევმა მუხრანში, პრემიერ-მინისტრ ირაკლი ღარიბაშვილთან ერთად გამართულ ბრიფინგზე განაცხადა.

მისი თქმით, მხარეებმა სამომავლო ენერგეტიკულ პოლიტიკასა და ახალ პროექტებზე ისაუბრეს.

„მოუთმენლად ველით ახალი პროექტების დაწყებას, რათა გაიზარდოს ბუნებრივი აირის ექსპორტი საერთაშორისო ბაზრებზე. ჩვენ ვაპირებთ 22 მილიონი კუბური მეტრის ექსპორტს და უფრო გავზარდოთ მომდევნო წლებში. წელს ხელი მოვაწერეთ ურთიერთგაგების მემორანდუმს აზერბაიჯანსა და ევროპას შორის და მომდევნო ხუთი წლის განმავლობაში აზერბაიჯანი აპირებს, გააორმაგოს ბუნებრივი აირის ექსპორტი ევროპის მიმართულებით,“ - განაცხადა ალიევმა.

მისივე თქმით, აზერბაიჯანი აპირებს 2027 წლისთვის ევროპაში ექსპორტზე გაიტანოს თითქმის 20 მილიარდი კუბური მეტრი ბუნებრივი აირი.

„ეს განვიხილეთ საქართველოს პრემიერ-მინისტრთან. ბაქო-თბილისი-ჯეიჰანის მილსადენი გაზრდის ექსპორტს და კიდევ უფრო დაიტვირთება მილსადენი. გვინდა, გამოვიყენოთ ბაქო-სუფსას ტერმინალიც, ვიცი, რომ არ არის ახლა ქმედითი, მაგრამ გვინდა, დავტივირთოთ ეს არხიც“, – განაცხადა ილჰამ ალიევმა.

ახალი პროექტები ითვალისწინებს ელექტროენერგიის მიმართულებით ინიციატივებსაც.

ილჰამ ალიევის თქმით, აზერბაიჯანი აპირებს ექსპორტზე გაიტანოს ელექტროენერგია საერთაშორისო ბაზრებზე და ეს მარშრუტი აუცილებლად გაივლის საქართველოს.

„10 გიგავატი არის ჩვენი შესაძლებლობები განახლებადი ენერგიის კუთხით და კასპიის ზღვის გავლით გვაქვს საშუალება 157 გიგავატი გავიტანოთ ექპორტზე. ეს იქნება ახალი სამიზნე ორიენტირი, რომ ელექტროენერგია გავიტანოთ ექსპორტზე და საქართველო და აზერბაიჯანი ითანამშრომელებენ ამ იმართულებითაც. ამით გაიზრდება ჩვენი კეთილდღეობა, ენერგოდერეფნების პოტენციალი,“ - აცხადებს ალიევი.