HELIOS ENERGY: ნეტო-აღრიცხვის ახალ მოდელთან დაკავშირებით მონახაზს ოქტომბერში წარვადგენთ
ნეტო-აღრიცხვის ახალ მოდელთან დაკავშირებით ჩვენს მონახაზს ოქტომბერში წარვადგენთ - ამის შესახებ „ენერგონიუსთან“ Helios Energy-ს დამფუძნებელი თორნიკე დარჯანია საუბრობს.
მისი თქმით, ბუნებრივია, რომ ნეტო-აღრიცხვის ის მოდელი, რომელიც დღეს პრაქტიკაშია დანერგილი, ამ სახით მუდმივად ვეღარ იარსებებს. ამიტომ, ახალი მოდელის შემუშავების საკითხზე კერძო სექტორი სემეკთან ერთად მუშაობს.
როგორც თორნიკე დარჯანია განმარტავს, დაცული უნდა იყოს იმ ფიზიკური თუ იურიდიული პირების ინტერესები, რომლებიც ნეტო-აღრიცხვის სისტემაში და ქსელში ახორციელებს ინვესტიციას.
„ჩვენ არ გვაქვს იმის მოლოდინი, რომ რეგულაცია შეიცვლება ისე, რომ ჩვენ ეს არ ვიცოდეთ, ან რამე გაუარესდება და ინვესტორებს ცუდ ვითარებაში ჩავაყენებთ. ნებისმიერი ადამიანი, რომელიც მზის ელექტროსადგურში აკეთებს ინვესტიციას, არის ჩვეულებრივი ინვესტორი. ამიტომ, მათი ინტერესები დაცული უნდა იყოს. უნდა არსებობდეს რეგულაციის და კანონმდებლობის მიმართ ნდობა და დარწმუნებულები ვართ, ასეც იქნება, რადგან ამაზე მხარდაჭერა გვაქვს როგორც სემეკ-იდან, ასევე სამინისტროდან და მთავრობიდან.
რაც შეეხება იმას, თუ რა მოდელი გვექნება მომავალში, ამაზე აქტიურად ვმუშაობთ სემეკთან. ოქტომბერში ჩვენ გვექნება მონახაზი და დავიწყებთ ერთობლივ მსჯელობას, იმიტომ რომ სემეკი ამ მომენტისთვის მუშაობს მეოთხე ენერგეტიკული პაკეტის დანერგვაზე. რაც თავისთავად, ნეტო-აღრიცხვის რეგულაციას, ისეთი სახით, როგორიც დღეს გვაქვს - არ ცნობს. მაგრამ ეს იმას არ ნიშნავს, რომ რამე გაუარესდება“ - ამბობს თორნიკე დარჯანია.
მოქალაქეებისა და საწარმოების მიერ საკუთარი სახლის სახურავებზე დამონტაჟებული მიკრო-სიმძლავრეების რაოდენობა 800 აღწევს. მათი ჯამური დადგმული სიმძლავრე 50 მგვტ-ზე მეტია.
ნეტო-აღრიცხვის მოდელი დღეს შემდეგნაირია: თუ პირი ფლობს მზის, ქარის, ჰიდრო ან სხვა განახლებადი ენერგიის წყაროზე მომუშავე მიკროსიმძლავრის ელექტროსადგურს, რომლის სიმძლავრე არ აღემატება 500 კილოვატს, მას შეუძლია პარალელურ რეჟიმში ჩაერთოს ელექტროენერგიის გამანაწილებელ ქსელში და ჭარბად გამომუშავებული ელექტროენერგია მიაწოდოს გამანაწილებელ კომპანიას. ეს პირს საშუალებას მისცემს, დაიკმაყოფილოს საკუთარი მოხმარება, დაზოგოს კომუნალური ხარჯები და მიიღოს სარგებელი გამანაწილებელი კომპანიისაგან.
energynews.ge
