გარდაბნის ახალი თბოსადგური განახლებული კონფიგურაციით აშენდება
გარდაბნის ახალ თბოელექტროსადგურზე ინტერესთა გამოხატვა განახლებული კონფიგურაციით გამოცხადდება. გაზის კომბინირებული ციკლის თბოელექტროსადგური „გარდაბანი 3“ 272 მგვტ-ის ნაცვლად, უფრო დიდი სიმძლავრის იქნება.
„უახლოეს მომავალში გამოცხადდება სახელმწიფოს მიერ ინტერესთა გამოხატვა. მიგვაჩნია, რომ კონფიგურაცია შესაცვლელია. უფრო დიდი მოცულობის თბოელექტროსადგურის მშენებლობაა სისტემისთვის საჭირო და რენტაბელური, სწორედ ამიტომ, პროექტში შესაბამისი ცვლილებები შედის,“ - განუცხადა „ბიზნესპარტნიორს“ ეკონომიკის მინისტრის მოადგილე რომეო მიქაუტაძემ და აღნიშნა, რომ სწორედ ეს გახდა პროექტის გაჭიანურების მიზეზი.
გაზის კომბინირებული ციკლის თბოელექტროსადგური „გარდაბანი 3“-ის ასაშენებლად საერთაშორისო ფასთა გამოკითხვა 2020 წელს გამოცხადდა. ის 272 მგვტ სიმძლავრის უნდა ყოფილიყო და მისი ექსპლუატაციაში შესვლა 2023 წლისთვის იყო დაგეგმილი.
ახალი თბოელექტროსადგური უკვე არსებული თბოსადგურების „გარდაბანი 1“ და “გარდაბანი 2“ მიმდებარედ აშენდება.
