თიბისი კაპიტალი: ლარის დამატებით გამყარების მცირე პოტენციალი კვლავ არსებობს

თიბისი კაპიტალმა მთავარი ეკონომისტის ყოველკვირეული განალებული ანგარიში გამოაქვეყნა. 
პუბლიკაციის მიხედვით, ლარის დამატებით გამყარების მცირე პოტენციალი კვლავ არსებობს. 

აღსანიშნავია, რომ ბოლო პერიოდში აშშ დოლარი რეგიონის სხვა ვალუტებთან მიმართებით გამყარდა. მიუხედავად ამისა, თიბისი კაპიტალის მოსაზრებით, ლარის დამატებით გამყარების, მართალია მხოლოდ მცირე, მაგრამ პოტენციალი კვლავ არსებობს.

ევრო/დოლარის წყვილს რაც შეეხება, ახლო პერსპექტივაში პროგნოზის გაკეთება საკმაოდ რთულია. სადღეისოდ, სხვა ფაქტორებთან ერთად, ევროს დამატებით დასუსტება ენერგომატარებლების გაზრდილი ფასების გამო ევროზონის სავაჭრო ბალანსის გაუარესებამაც გამოიწვია. თანაც, გლობალური რეცესიის რისკების ზრდა დოლარის მხარდამჭერი არგუმენტია. ამავდროულად, თიბისი კაპიტალის აზრით, უფრო სანდო, საშუალო ვადიანი ინდიკატორები ევროს გამყარებაზე მიუთითებს.

"ამ კუთხით მნიშვნელოვანია, რომ პროციკლური ქცევა შეძლებისდაგვარად იქნას თავიდან არიდებული. საკუთრივ, დოლარის გამყარება უფრო იმაზე მიუთითებს, რომ გარკვეულ პერიოდში ის გაუფასურდება, ვიდრე პირიქით."–ამბობს ეკონომისტი. 

რაც შეეხება ინფლაციას, ივნისში წლიური მაჩვენებელი 13.3-დან, 12.8%-მდე შემცირდა, თუმცა, როგორც თიბისი კაპიტალის მთავარი ეკონომისტი აღნიშნავს, მხოლოდ წინა წლის მაღალი საბაზო ეფექტის გამო, რადგანაც წინა თვესთან შედარებით, სეზონური ფაქტორების გათვალისწინებით, ივნისში ფასები მაინც მნიშვნელოვნად გაიზარდა.

როგორც მთავარი ეკონომისტი აღნიშნავს, საერთაშორისო ბაზრებზე სასაქონლო ფასების შემცირება და ლარის გამყარება იძლევა იმის თქმის საშუალებას, რომ მომდევნო თვეებში ყოველთვიური ინფლაცია უკვე დაბალი იქნება, რაც თიბისი კაპიტალის აზრით, წლის ბოლოსთვის რეფინანსირების განაკვეთის შედარებით მეტად შემცირებას გულისხმობს. წლიური ინფლაციის მხრივ, სამიზნესთან დაახლოების მოლოდინი მხოლოდ მომდევნო წელსაა რეალისტური.