თემურ ჭყონია: დღეს ქვეყანას ოთხნიშნა ეკონომიკური ზრდა სჭირდება

ბიზნესმენ თემურ ჭყონია მიიჩნევს, რომ ქვეყნის ეკონომიკისთვის ორნიშნა ეკონომიკური ზრდა საკმარისი არ არის და მდგომარეობის გამოსწორების მიზნით, უკვე ოთხნიშნა ზრდაა საჭირო.

"თუ ეკონომიკის ზრდა ახლა ორნიშნულიანია, ჩვენი დღევანდელი მდგომარეობა ადასტურებს, რომ ორნიშნა მაჩვენებელი საკმარისი არაა და საჭიროა უკვე ზრდის ოთხნიშნა მაჩვენებელი," - განაცხადა "კოკა-კოლა ბოთლერს ჯორჯიას" დამფუძნებელმა.

მისივე თქმით, მისი დაფუძნებული ყველა კომპანია ზრდას განიცდის და ეს  მენეჯმენტის დამსახურებაა და არა პარლამენტის გადაწყვეტილებების.

“მე რომელ ბიზნესშიც ვმონაწილეობ ყველა ზრდას, აღმავლობას განიცდის, მაგრამ არ მიმაჩნია, რომ ეს რაღაც რეგულაციების შედეგია. ვფიქრობ, ეს ბრენდის სწორი მართვის და მენეჯმენტის შედეგია და არა პარლამენტში მიღებული გადაწყვეტილებების", - განმარტავს თემურ ჭყონია.

"საქსტატის" მონაცემებით, 2021 წლის აპრილში საქართველოს ეკონომიკა 44.8%-ით გაიზარდა, იანვარ-აპრილში კი ზრდის მაჩვენებელმა 8.1% შეადგინა.