თბილისში 25 ლოკაციიდან 13 ადგილას ჰაერში მავნე ნივთიერებების გაფრქვევები ნორმას აჭარბებს
გარემოს დაცვისა და სოფლის მეურნეობის მინისტრის მოადგილის, ნინო თანდილაშვილის განცხადებით, თბილისში 25 ლოკაციიდან 13 ადგილას ატმოსფერულ ჰაერში მავნე ნივთიერებების გაფრქვევები ნორმას აჭარბებს.
„ჩვენ მუდმივად ვაწარმოებთ ჰაერის ხარისხზე დაკვირვებას. არამხოლოდ თბილისში, არამედ საქართველოს სხვა მსხვილ ქალაქებში. 2022 წლის მონაცემებმა გვაჩვენა რომ გვაქვს ცალკეული მავნე ნივთიერებების კონცენტრაციების მატება ატმოსფერულ ჰაერში. ეს არის ძირითადად აზოტის დიოქსიდები, რომლის გამომწვევი ძირითადი მიზეზი მოჭარბებული სატრანსპორტო საშუალებების მიძრაობაა, განსაკუთრებით მსხვილ ქალაქებში.
ეს ყველაფერი თვალსაჩინოდ ჩანს დედაქალაქში, სადაც 25 ლოკაციიდან 13 ადგილას ატმოსფერულ ჰაერში მავნე ნივთიერებების გაფრქვევები დასაშვებ ნორმას ორჯერ და მეტჯერ აღემატება და ეს საკითხი არის ძალიან საყურადღებო.
ამისთვის აუცილებელი გახდა დამატებითი ზომების შემოღება. სწორედ ამიტომ გადაწყდა ევრო ხუთის სტანდარტის შემოღება. ეს ძირითადად 2013 წლამდე სატრანსპოტრტო საშუალებების იმპორტის შეზღუდვას გულისხმობს.“-აღნიშნა ნინო თანდილაშვილმა.
შეგახსენებთ, საქართველოში 2013 წლამდე გამოშვებული ავტომობილების იმპორტი 2024 წლიდან აიკრძალება. რეგულაცია ავტობუსებსა და სატვირთო ავტომობილებზე 2025 წლის პირველი იანვრიდან ამოქმედდება.
