სამინისტრო: "კლიმატის ცვლილებისა და ენერგეტიკის ინტეგრირებული ეროვნული გეგმა“ ენერგოუსაფრთხოებას გაზრდის
ეკონომიკისა და გარემოს დაცვის სამინისტროები „კლიმატის ცვლილებისა და ენერგეტიკის ინტეგრირებული ეროვნული გეგმის“ საჯარო განხილვებს აგრძელებენ.
დოკუმენტის შემუშავებისა და განხილვის პროცესში აქტიურადაა ჩართული ევროპის ენერგეტიკული გაერთიანებაც. დოკუმენტის მიზანი ევროპის ენერგეტიკულ სისტემასთან დაახლოებაა.
„გეგმის შემუშავება ევროკავშირის ენერგოდირექტივების საფუძველზე მიმდინარეობს. ამდენად, ევროპის ენერგეტიკული გაერთიანება ჩართულია ამ სტრატეგიული დოკუმენტის განხილვის მთელ პროცესში, რათა ქვეყანამ წარმატებით განახორციელოს საკუთარი ენერგეტიკული სისტემის ევროპულთან ჰარმონიზაცია და ადგილობრივი ენერგეტიკული ბაზრის რეფორმირება, რაც ხელს შეუწყობს კონკურენციის განვითარებასა და ახალი ინვესტიციების მოზიდვას, ასევე მიმართული იქნება გარე ენერგეტიკულ ბაზრებზე დამოკიდებულების შემცირებისა და ქვეყნის ენერგეტიკული უსაფრთხოების გაზრდისკენ",- ნათქვამია განცხადებაში.
აქვე განმარტებულია, რომ ენერგეტიკული გაერთიანების წარმომადგენლებთან ერთად შემუშავდა 10 შეხვედრის თემატიკა.
"1. ენერგეტიკისა და კლიმატის ცვლილების ინტეგრირებული გეგმის მიმოხილვა; 2. მეთოდოლოგია 2030 წლის სამიზნე მაჩვენებლებისთვის (პროგნოზების შემუშავების მეთოდოლოგია. მეთოდი, მოდელირების ჩარჩო, სცენარების განსაზღვრა. გასული ტენდენციების ანალიზი და საბაზისო წლის ინფორმაცია: მონაცემთა წყაროები, ტენდენციები და ძირითადი მიგნებები); 3. TIMES-ის მოდელის შაბლონების აღწერა (მოდელის გასაზიარებლად შეთავაზებული იქნა NDA -გაუთქმელობის ხელშეკრულება). წარმოდგენილი იქნა ენერგეტიკის გენერაციის განვითარების სცენარები; 4. ენერგოეფექტურობა; 5. ენერგეტიკის სექტორის NECP სცენარების წინასწარი შედეგების პრეზენტაცია (ზემოქმედების მიმოხილვა, რომელიც ექნება თითოეულ პოლიტიკის სცენარს სათბურის გაზების, განახლებადი ენერგიებისა და ენერგოეფექტურობის კუთხით); 6. დეკარბონიზაცია, სათბური გაზების ემისიები და განახლებადი ენერგიები; 7. წყალსაცავიანი ჰესები; 8. შეხვედრის თემაა: „ენერგეტიკული უსაფრთხოება“; 9. შიდა ენერგეტიკული ბაზარი (ენერგიის გადაცემის ინფრასტრუქტურა, ბაზრის ინტეგრაცია, ენერგეტიკული სიღარიბე); 10. კვლევა, ინოვაცია და კონკურენტუნარიანობა",- ვკითხულობთ განცხადებაში.
ამასთან, აღნიშნულია, რომ დოკუმენტის შემუშავების პროცესში კერძო და საკარო სექტორი, ასევე არასამთავრობო და სამოქალაქო ორგანიზაციები აქტიურად არიან ჩართული.
"აღნიშნული პროცესი თავიდანვე მოიცავდა ათი შეხვედრის გამართვას, რომლის ფარგლებშიც განხილული იქნებოდა სტრატეგიული დოკუმენტის ყოველი მიმართულება, მათ შორის, წყალსაცავიან ჰიდროელექტროსადგურებთან დაკავშირებული საკითხებიც. ორგანიზატორების მიერ განხილვის პროცესში თავიდანვე მოწვეული იყო საზოგადოებრივი ჯგუფი, რომელიც „რიონის ხეობის მცველების“ სახელითაა ცნობილი. ისინი მხოლოდ რამდენიმე შეხვედრას დაესწრნენ და შემდეგ უარი თქვეს სტრატეგიული დოკუმენტით განსაზღვრული, მეტად აქტუალურ საკითხების განხილვაში მონაწილეობაზე. აღსანიშნავია, რომ ამ ჯგუფმა ასევე ცალმხრივად უარი თქვა მონაწილეობაზე მედიაციის პროცესში „ნამახვანი ჰესთან“ დაკავშირებით, რომელიც ევროკავშირის ენერგეტიკული გაერთიანების დავების გადაწყვეტის ცენტრის ორგანიზებით მიმდინარეობდა და მასში ჩართული ყველა დაინტერესებული მხარე იყო წარმოდგენილი. „კლიმატის ცვლილებისა და ენერგეტიკის ინტეგრირებული ეროვნული გეგმის“ საჯარო განხილვა საქართველოში პირველად ხორციელდება და ყველა დაინტერესებულ სპეციალისტს აქვს შესაძლებლობა, მიიღოს უშუალო მონაწილეობა ქვეყნის ენერგეტიკული განვითარების სტრატეგიული დოკუმენტის შემუშავებაში. ვფიქრობთ, აღნიშნული განხილვა არის საჯარო, კერძო და არასამთავრობო სექტორის თანამშრომლობის კარგი მაგალითი“, – ნათქვამია ლევან დავითაშვილის უწყების განცხადებაში.
