საქართველოში მოქმედი თეატრების დატვირთულობა გაზრდილია

საქართველოს სტატისტიკის ეროვნული სამსახურის ინფორმაციით,  2022 წლის მონაცემებზე დაყრდნობით,  საქართველოში მოქმედი თეატრების დატვირთულობა გაზრდილია.

საქსტატის ცნობით, 2022 წლის განმავლობაში ქვეყანაში 52 პროფესიული თეატრი ფუნქციონირებდა, აქედან, 2 ერთეული იყო ოპერისა და ბალეტის, 41 - დრამის, მუსიკალური კომედიისა და მინიატურების, 2 - ბავშვთა და მოზარდმაყურებელთა, ხოლო 7 - თოჯინების თეატრი. თეატრების უმრავლესობა - 51.9% თბილისში, 15.4% - იმერეთში, ხოლო დარჩენილი 32.7% სხვა რეგიონებში ფუნქციონირებდა.

მათივე ინფორმაციით,  2022 წელს ქვეყანაში 4 000 ღონისძიება ჩატარდა, აქედან - 256 გასვლითი (ქალაქის გარეთ) იყო. ქართულმა თეატრალურმა დასებმა საზღვარგარეთ ამ პერიოდის განმავლობაში 79 ღონისძიება გამართეს, რომელშიც 920 პირი მონაწილეობდა.

2022 წელს ჩატარებული სპექტაკლების რაოდენობა, წინა წელთან შედარებით 112.3%-ითაა გაზრდილი და 3 794 ერთეული შეადგინა. აღსანიშნია, რომ სპექტაკლების ნახევარზე მეტი, რაც 63.7%-ს შეადგენს, დედაქალაქში გაიმართა.

2022 წელს ღონისძიებებზე დამსწრე მაყურებელთა საერთო რიცხოვნობა, წინა წელთან შედარებით 3-ჯერ გაიზარდა და 547.0 ათასი შეადგინა. მაყურებელთა დასწრების ყველაზე მაღალი მაჩვენებლით გამოირჩეოდა ქ. თბილისი (64.8 პროცენტით), ხოლო მეორე ადგილზეა იმერეთი (10.0 პროცენტით).

2022 წელს საქართველოში 252 მუზეუმი და მუზეუმ-ნაკრძალი ფუნქციონირებდა, საიდანაც 98 ერთეული წარმოადგენს მემორიალურ მუზეუმს, 71 ერთეული - ისტორიულს (მხარეთმცოდნეობის), 24 ერთეული - ხელოვნების, 13 ერთეული - მუზეუმ-ნაკრძალს, 2 ერთეული - ლიტერატურულს, ხოლო 44 სხვა სახის მუზეუმს.

2022 წელს ყველაზე მეტი მუზეუმი ფუნქციონირებდა ქ. თბილისში (23.0 %). ამ მაჩვენებლით მეორე და მესამე ადგილებზე იმერეთის (15.9%) და კახეთის (13.5%) რეგიონებია.

2022 წელს მუზეუმებში დამთვალიერებელთა რიცხოვნობა, წინა წელთან შედარებით 109.2 პროცენტით გაიზარდა და 1 688.2 ათასი კაცი შეადგინა. საშუალოდ ერთ მუზეუმზე 6.7 ათასი დამთვალიერებელი მოდის.

2022 წელს მუზეუმებში ექსკურსიების რაოდენობა 95.0 პროცენტით გაიზარდა და 39 110 ერთეული შეადგინა, ხოლო გამოფენათა რაოდენობა - 59.0 პროცენტით გაიზარდა და 854 ერთეული იყო.