საქართველო მიმზიდველი ქვეყანაა პირდაპირი უცხოური ინვესტიციების მოზიდვის კუთხით - თურნავა
„ეკონომიკური თანამშრომლობისა და განვითარების ორგანიზაციამ ევროკავშირთან ერთად ჩაატარა საქართველოს საინვესტიციო გარემოს კვლევა, რომლითაც შეისწავლა საქართველოში 22 სხვადასხვა დარგში არსებული ვითარება და გამოაქვეყნა შეფასება, რომლის მიხედვითაც საქართველო მსოფლიოში ერთერთი ყველაზე ღია ეკონომიკაა პირდაპირი უცხოური ინვესტიციების მიმართ. ჩვენ ვართ მერვე 80 - ზე მეტ ქვეყანას შორის. ეს იმას ნიშნავს, რომ საქართველოში ჩატარებული ეკონომიკური და სტრუქტურული რეფორმები; მხარდაჭერის მექანიზმები, რომელთაც ჩვენ ინვესტორებს ვთავაზობთ, არის ძალიან მიმზიდველი და მიუხედავად პანდემიისა, მიუხედავად გლობალური გამოწვევისა, საქართველო კვლავაც ერთერთი მიმზიდველი ქვეყანა რჩება პირდაპირი უცხოური ინვესტიციებისა და უცხოელი ინვესტორების მიმართ,“ - განაცხადა ეკონომიკისა და მდგრადი განვითარების მინისტრის მოვალეობის შემსრულებელმა ნათია თურნავამ „საქართველოს საინვესტიციო პოლიტიკის შეფასების“ დოკუმენტის მიმართ, რომელიც ეკონომიკური თანამშრომლობისა და განვითარების ორგანიზაციამ (OECD) ევროკავშირთან ერთად საქართველოს მთავრობის დაკვეთით მოამზადა.
ნათია თურნავას განცხადებით, საინვესტიციო პოლიტიკის შეფასების საფუძველზე, საქართველოს პირველად მიენიჭა რეიტინგი ეკონომიკური თანამშრომლობისა და განვითარების ორგანიზაციის (OECD) კვლევაში FDI Regulatory Restrictiveness Index და აღნიშნულ კვლევაში საქართველომ დაიკავა მოწინავე მე-8 პოზიცია, 80-ზე მეტ ქვეყანას შორის, როგორც მსოფლიოში ერთ-ერთი ყველაზე ღია ეკონომიკა უცხოური ინვესტიციების მოზიდვის კუთხით. კვლევა მოიცავს ქვეყანაში არსებული 22 ეკონომიკური სექტორის შესწავლას და პირდაპირ უცხოურ ინვესტიციების მოზიდვასთან დაკავშირებული ბარიერების იდენტიფიცირებას.
„ეს არ არის პირველი ასეთი შეფასება. მცირე ხნის წინ აშშ - ის სახელმწიფო დეპარტამენტმა ასევე გამოაქვეყნა ანგარიში, რომლის მიხედვითაც საქართველო დასახელებულია როგორც ერთ-ერთი ძალიან ღია და მიმზიდველი ეკონომიკა უცხოელი ინვესტორებისთვის. რა თქმა უნდა, ეს ქმნის ძალიან კარგ წინაპირობას, რომ 2021 წელს ჩვენ გავზარდოთ პირდაპირი უცხოური ინვესტიციები და ეკონომიკა გაჯანსაღდეს,“ - განაცხადა ნათია თურნავამ.
მინისტრის მოვალეობის შემსრულებლის განცხადებით, საქართველო ასევე ერთ-ერთი გამორჩეულია პირდაპირი უცხოური ინვესტიციების მოცულობით მშპ-სთან მიმართებაში. „ამ მაჩვენებლით საქართველო გლობალურად ერთ-ერთი ყველაზე წარმატებული ქვეყანაა - 7,5 პროცენტი მშპ-ში არის პირდაპირი უცხოური ინვესტიციები, რაც ერთერთი საუკეთესო გლობალურად მაჩვენებელია,“ - განაცხადა ნათია თურნავამ.
