რა წიაღისეული სიმდიდრე გვაქვს - აღწერაში საქართველოს აშშ დაეხმარება
აშშ საქართველოს წიაღისეულის აღწერაში დაეხმარება. როგორც ეკონომიკის მინისტრი ამბობს, შეთანხმება მალე გაფორმდება.
„აშშ გაგვიწევს დახმარებას სამთო მომპოვებელ ინდუსტრიაში. ის ჩვენს მინერალურ რესურსს, წიაღისეულს დეტალურად აღწერს. მალე ხელი მოეწერება მემორანდუმს თანამშრომლობის შესახებ და ჩვენ, აშშ - ის დახმარებით, გვექნება დეტალური გეოლოგიური ინფორმაცია იმისთვის, რომ უფრო მეტად მოვიზიდოთ ინვესტორები სწორედ სამთო მომპოვებელ დარგში და მათ შორის, აშშ - დან,“ - განაცხადა ნათია თურნავამ აშშ-ის ელჩთან საქართველოში კელი დეგნანთან შეხვედრის შემდეგ.
ერთ-ერთი საკითხი, რომელიც შეხვედრაზე განიხილეს ამერიკულ მხარესთან საქართველოს სამთომოპოვებით სექტორში სამომავლო თანამშრომლობას ეხება.
სექტორში წინასწარი კვლევის მიზანი ქვეყანაში არსებული წიაღისეულის და მინერალური რესურსების პოტენციალის განსაზღვრაა, რაც, თავის მხრივ, სამინისტროს მოლოდინით ხელს შეუწყობს დარგში ინვესტიციების, მათ შორის, ამერიკული ინვესტიციების განხორციელებას.
მემორანდუმის დეტალებზე აქტიური მუშაობა მიმდინარეობს. აშშ-ს ელჩმა საქართველოში დაადასტურა რომ ამ პროექტის განხორციელებას მისი მხარდაჭერაც ექნება.
