პროდუქტი და მომსახურება, რომელიც ბოლო ერთ წელში ყველაზე მეტად გაძვირდა

საქსტატის ინფორმაციით, ივნისში წლიური ინფლაცია 9,9% იყო — ეს ბოლო 10 წლის განმავლობაში ფასების ზრდის მაქსიმალური მაჩვენებელია.

საქსტატის მიერ გამოქვეყნებული მონაცემებით, ივნისის წლიურ ინფლაციაზე ყველაზე დიდი გავლენა ტრანსპორტის, კომუნალურებისა და დასვენება, გართობის ჯგუფებში ფასების ზრდამ მოახდინა.

"ბიზნესპარტნიორი“ გთავაზობთ, დეტალური ინდექსების საშუალებით იმ კონკრეტული პროდუქტების ჩამონათვალს, რომლებზეც ფასები ივნისში ყველაზე მეტად გაიზარდა.

ზეთი და ცხიმი (47.1%), ბოსტნეული და ბაღჩეული (16.6%), შაქარი, ჯემი და სხვა.ტკბილეული (13.7%), თევზეული (11.1%), რძე, ყველი და კვერცხი (10.6%), მინერალური და წყაროს წყალი, უალკოჰოლო სასმელები და ნატურალური წვენები (7.3%), ყავა, ჩაი და კაკაო (7.2%), პური და პურპროდუქტები (5.5%), ხორცი და ხორცის პროდუქტები (5.3%). ამასთან, ფასები შემცირებულია ხილსა და ყურძენზე (-19.5%).

ტრანსპორტის ჯგუფში ფასები გაიზარდა 22%-ით, რაც 2.54%-ული პუნქტით აისახა მთლიანი ინდექსის ზრდაზე. ფასები გაიზარდა პირადი სატრანსპორტო საშუალებების ექსპლუატაციაზე (33.4%), სატრანსპორტო საშუალებების შეძენაზე (1.8%) და სატრანსპორტო მომსახურებაზე (1.6%);

საცხოვრებელი, წყალი, ელ.ენერგია, აირი: ჯგუფში დაფიქსირდა ფასების 10.5%-იანი მატება, რაც 1.59%-ული პუნქტით აისახა წლიურ ინფლაციაზე. ფასები გაიზარდა ქვეჯგუფებზე:ელექტროენერგია, აირი და სათბობის სხვა სახეები (14%), საცხოვრებლის მიმდინარე მოვლა და შეკეთება (7.3%), წყალმომარაგება და საცხოვრებელთან დაკავშირებული სხვა მომსახურება (4.5%). ამასთან, ფასები შემცირდა საცხოვრებელზე ფაქტიური გადასახადის ქვეჯგუფზე (-6.5%).