პრეზიდენტი ჰესების მშენებლობის საკითხზე სახელმწიფო კომისიის შექმნის ინიციატივით გამოდის
საქართველოს პრეზიდენტის სალომე ზურაბიშვილის შეფასებით, ქვეყანაში არსებული კრიზისის დაძლევაში საზოგადოება სოლიდარული უნდა იყოს.
“უდიდესი გამოწვევაა ქვეყნის ეკონომიკა და კრიზისის გადალახვა. საზოგადოება ამ საკითხთან მიმართებაშიც გაყოფილია. ზოგი მიიჩნევს, რომ ეკონომიკა უნდა იყოს აბსოლუტური პრიორიტეტი და აღარ უნდა დაწესდეს არც ხელახალი ჩაკეტვა, არც შეზღუდვები. ზოგი კი აბსოლუტურ უპირატესობას ჯანმრთელობას და ადამიანთა სიცოცხლეს ანიჭებს. ამ კრიზისის დაძლევაში, სოლიდარობა გვჭირდება როგორც არასდროს. ერთიანი ძალისხმევა რომ ინკლუზიური მიდგომებით და სოციალური პასუხისმგებლობით ვეცადოთ ერთდროულად ეკონომიკის გაცოცხლება, ინვესტიციების მოზიდვა და მაქსიმალურად ხელი გავუწოდოთ სოცილაურად დაუცველი ფენებს ჩვენი საზოგადოებისა“,- აღნიშნა სალომე ზურაბიშვილმა.
მისი თქმით,საზოგადოებას ეკონომიკურ საკითხებთან დაკავშირებითაც აქვს დაპირისპირებული პოზიციები.
მან “ნამახვანჰესის“ მაგალითი მოიყვანა.
“ერთის მხრივ ის საზოგადოება, ვისი წუხილიც ძალიან კარგად მესმის და ვუთანაგრძნობ, ითხოვს ჩვენი ბუნებრივი რესურსებისა და მიწის დაცვას უხეში ჩარევისა და ზემოქმედებისგან. ადგილობრივი მოსახლეობა აპელირებს იმ საფრთხეებზე, რომელიც ემუქრება ზოგადად ეკოლოგიას, რეგიონში სოფლის მეურნეობას, მეღვინეობისა და ტურიზმის პოტენციალს. მეორე მხრივ კი, ვინც ინვესტიციების მოზიდვას, ეკონომიკის გაცოცხლებასა და ენერგო-დამოუკდიებლობას ანიჭებს უპირატესობას და ადამიანის სიდუხჭირიდან თავის დაღწევაზე აპელირებს. ორივე მხარეს აქვს ძლიერი არგუმენტები. უალტერნატივოდ მიმაჩნია ორივე მოსაზრების გათვალისწინება და შეჯერება. ამისათვის საჭიროა მეტი კომუნიკაცია, მეტი საჯაროობა, მეტი გაანალიზება ყველა არგუმენტის და ყველა შესაძლო საფრთხის“,- აცხადებს სალომე ზურაბიშვილი.
პრეზიდენტი მიიჩნევს, რომ უნდა შეიქმნას სახელმწიფო კომისია, სადაც ეკონომისტები, ენერგეტიკოსები, ბუნებადამცველები, ადგილობრივი მოსახლეობა და უცხოელი ექსპერტები ერთად განიხილავენ არა მხოლოდ “ნამახვანჰესის“ ბედს, არამედ მომავალ გეგმებსა და პერსპექტივას ენერგეტიკის მიმართულებით.
სალომე ზურაბიშვილი ამბობს, რომ ასეთი მსჯელობა გასაჯაროებული უნდა იყოს და მზად არის, ამ მიზნისთვის პრეზიდენტის სასახლის პლატფორმა გამოიყენონ.
