პრემიერი: სასტუმროები გადაჭედილია ტურისტებით, ეკონომიკა დუღს 

პრემიერ-მინისტრის ირაკლი ღარიბაშვილის შეფასებით, საქართველოს აქვს მსოფლიოში უპრეცედენტო ეკონომიკური ზრდა. 

მისი თქმით, ქვეყანაში ბიზნესს და მოქალაქეებს სტაბილურობის განცდა გაუჩნდათ. 

“პანდემია მსოფლიო გამოწვევაა, კორონავირუსმა მსოფლიო მოიცვა. წინა წელს გააჩერა მთელი მსოფლიოს ეკონომიკა. მილიონობით ადამიანმა დაკარგა სამუშაო ადგილი და ძალიან ბევრი ადამიანი სამწუხაროდ გარდაიცვალა ამ ვირუსის გამო. ჩვენს ქვეყანაშიც შემოვიდა ეს ვირუსი, საკმაოდ მძვინვარებს. მსოფლიოში მეოთხე ტალღაა. ისრაელში, იმის მიუხედავად რომ ეფექტიანად იმართა თავის დროზე, მოსახლეობის ნახევარი არ აიცრა ამის გამო, კიდევ მეოთხე ტალღა დაიწყო.

თებერვლიდან ჩვენ ეკონომიკის ეტაპობრივი გახსნა დავიწყეთ, რადგან შარშან ჩვენს მოსახლეობას ძალიან გაუჭირდა. ბევრმა სამუშაო ადგილი დაკარგა. ისედაც გაჭირვებულმა ხალხმა შემოსავალი დაკარგა და ჩვენი მხრიდან 200 ლარიანი დახმარება რა თქმა უნდა საკმარისი არ იყო. შესაბამისად, საჭირო იყო ეკონომიკის ეტაპობრივი გახსნა. ჩვენს ბიზნესს და მოქალაქეებს სტაბილურობის განცდა გავუჩინეთ. სტაბილურობა უმნიშვნელოვანესია, რომ ეკონომიკა განვითარდეს, მოქალაქემ დაგეგმოს საკუთარი მომავალი. სტაბილურობის გარეშე არავითარი განვითარება არ იქნება. შესაბამისად ჩვენ გვაქვს უპრეცედენტო ზრდა მთელ მსოფლიოში, გვაქვს ორნიშნა ეკონომიკური ზრდა. შედეგად მოსახლეობამ ეს დეპრესიული დამოკიდებულება შეიცვალა, დაიწყო ახალი დოვლათის შექმნა, სამუშაო ადგილებს ათასობით ადამიანი დაუბრუნდა. ტურისტების საკმაოდ მძლავრი ნაკადი შემოვიდა ქვეყანაში, ტურისტული ადგილები სავსეა ტურისტებით, გადაჭედილია სასტუმროები და ეს ძალიან გვახარებს, რომ ეკონომიკა დუღს და მუშაობს“,- აღნიშნა ირაკლი ღარიბაშვილმა.