პრემიერი: რეგიონში არსებული მდგომარეობის მიუხედავად, საქართველოში FDI იზრდება

პირდაპირი უცხოური ინვესტიციების გაორმაგებული მაჩვენებელი იმაზე მიუთითებს, რომ ინვესტორები კარგად ხედავენ ქვეყანაში არსებულ სტაბილურ, მშვიდ ვითარებას, - პრემიერი საქართველოში პირდაპირი უცხოური ინვესტიციების სტატისტიკას აფასებს.

მისი თქმით,პირდაპირი უცხოური ინვესტიციების საერთო მოცულობა გაორმაგებულია, 1.675 მლრდ დოლარს შეადგენს, კოვიდამდე პერიოდთან შედარებით კი ეს მაჩვენებელი 70%-ით არის გაზრდილი.

„იმის მიუხედავად, რაც ხდება რეგიონში, უკრაინაში საშინელი ომი მიმდინარეობს, დაძაბულობაა ყველგან, რეცესია, ევროპაში, ყველგან, მთელი მსოფლიოს მასშტაბით. ამ ფონზე, ჩვენს ქვეყანაში განხორციელდა პირდაპირი უცხოური ინვესტიციები, რომელთა საერთო მოცულობამ შეადგინა მილიარდ 675 მლნ დოლარი. ეს არის თითქმის გაორმაგება. ჩვენ თუ ამას შევადარებთ წინა წელს და ასევე, მინდა ვთქვა, რომ კოვიდამდე პერიოდს თუ შევადარებთ, 2019 წელს მაგალითად, 70%-ით არის გაზრდილი პირდაპირი უცხოური ინვესტიციები. ეს მიუთითებს იმაზე, რომ ინვესტორები კარგად ხედავენ სიტუაციას, რომელიც არის შექმნილი ქვეყანაში. პირველ რიგში, ეს არის სტაბილურობა, რომელიც ჩვენ შევქმენით, მშვიდობა, სტაბილური პერიოდი, რომელიც ქვეყანაში დგას, გამჭვირვალობა, მე აქვე მინდა კიდევ ერთხელ შევახსენო ყველას, რომ საქართველო ბიუჯეტის გამჭვირვალობის მიხედვით არის მსოფლიოში პირველ ადგილზე. ამით ყველაფერია ნათქვამი, თუ როგორი მთავრობა ჰყავს დღეს ქვეყანას, როგორი ხელისუფლება, როგორი პოლიტიკა გვაქვს ჩვენ ზოგადად ბიზნესის, ინვესტორების მიმართ“,- აღნიშნა პრემიერ-მინისტრმა.