პრემიერი: მოგვწონს თუ არა, რუსეთთან სავაჭრო-ეკონომიკური ურთიერთობები გვაქვს
პრემიერი კიდევ ერთხელ შეეხო ომის დაწყების შემდეგ რუსეთისთვის ეკონომიკური სანქციების დაწესების საკითხს.
მისი თქმით, საქართველოს რუსეთთან სავაჭრო-ეკონომიკური ურთიერთობები აქვს, რომელიც იქ მცხოვრებ ჩვენი ქვეყნის მოქალაქეებს ეხება.
„საუბარი შეეხო რატომ არ დაუწესა, თუ რატომ არ მიუერთდა ეკონომიკურ სანქციებს საქართველო. ბუნებრივია, ლეგიტიმური კითხვაა, აინტერესებთ ადამიანებს. საქართველოს მოსახლეობის მნიშვნელოვანი წილი, დაახლოებით 1 მლნ ცხოვრობს რუსეთში. კარგად გვახსოვს „ნაციონალური მოძრაობის“ გაუაზრებელი, უგუნური პოლიტიკის შედეგად, თვითმფრინავებით გამოაგზავნეს საქართველოში, წაართვეს ბიზნესები, სახლები და საშინელი ტერორი გამოიარეს მათ, აღარ მაქვს საუბარი ომზე, ჩვენს ომზე, ომზეც გადავალ. ამის შემდეგ, სანქციებთან მიერთების თაობაზე გახსოვთ, რამხელა აჟიოტაჟი ატყდა. ჩვენ ვთქვით ძალიან მარტივად - რუსეთთან გვაქვს სავაჭრო-ეკონომიკური ურთიერთობები და ეს სავაჭრო ურთიერთობები ეხება ჩვენი მოქალაქეების დიდ ნაწილს. გვინდა, თუ არ გვინდა, მოგვწონს თუ არა, ესაა რეალობა, გაითვალისწინეთ ყველამ“, - აღნიშნა ირაკლი ღარიბაშვილმა პარლამენტში, სადაც წლიურ ანგარიშს წარადგენს.
