პანდემიის ფონზე სსფ-ს მისია საქართველოში ვირტუალურ რეჟიმში იმუშავებს

პანდემიის ფონზე, სავალუტო ფონდის მისია საქართველოში ვირტუალურ რეჟიმში იმუშავებს.

მერსედეს ვერა მარტინის ხელმძღვანელობით ფონდის მისია 14 სექტემბრამდე იმუშავებს. მან პირველი შეხვედრა დისტანციურ რეჟიმში ფინანსთა მინისტრთან გამართა.

ფინანსთა სამინისტროს მონაცემებით, მხარეებმა მიმოიხილეს მიმდინარე პერიოდში ქვეყანაში არსებული ეკონომიკური მდგომარეობა, ასევე მომავალი წლის ძირითადი ფისკალური და მაკროეკონომიკური პარამეტრები.

საუბარი შეეხო მთავრობის ანტიკრიზისულ პოლიტიკას, COVID-19-ის პანდემიის წინააღმდეგ ბრძოლის ღონისძიებებსა და ამ კუთხით, საერთაშორისო სავალუტო ფონდის მიერ საქართველოსთვის გამოყოფილი 200 მლნ აშშ დოლარის საბიუჯეტო დახმარებას, ასევე, განიხილეს სსფ-ის მიერ მხარდაჭერილი ეკონომიკური რეფორმები მიმდინარე და შემდგომ პერიოდში.

„აღინიშნა, რომ  გლობალური ეკონომიკური კრიზისის მიუხედავად, საქართველო ინარჩუნებს ეკონომიკურ მდგრადობას, რასაც ადასტურებს ორი ავტორიტეტული სარეიტინგო კომპანიის (S&P; Fitch) მიერ საქართველოსთვის სუვერენული რეიტინგის შენარჩუნება. შეხვედრაზე, კიდევ ერთხელ, ხაზი გაესვა საერთაშორისო საფინანსო ინსტიტუტების დახმარების მნიშვნელობას, რომელიც მიმართულია COVID-19-ის პანდემიის გავრცელების კონტროლისა და მისი უარყოფითი ეკონომიკური გავლენის შესამცირებლად“, - ნათქვამია სამინისტროს განცხადებაში.