ნათია თურნავა: აზერბაიჯანი რჩება ჩვენს ერთ-ერთ უმთავრეს სავაჭრო პარტნიორად
აზერბაიჯანი და საქართველო პარტნიორული ურთიერთობების გაღრმავება სურთ.
ეკონომიკის მინისტრის თქმით, აზერბაიჯანი კვლავაც რჩება საქართველოს ერთ-ერთ უმთავრეს სავაჭრო პარტნიორად.
ნათია თურნავა აზერბაიჯანში სამუშაო ვიზიტის ფარგლებში აზერბაიჯანელ კოლეგას მიქაელ ჯაბაროვს შეხვდა, რომელთანაც ორმხრივი სავაჭრო-ეკონომიკური საკითხები და თანამშრომლობის პრიორიტეტული მიმართულებები განიხილა.
„საქართველო-აზერბაიჯანი-თურქეთის სამმხრივი ბიზნესფორუმის გახსნამდე მე და ჩემს აზერბაიჯანელ კოლეგას შესაძლებლობა გვქონდა, გვემსჯელა საქართველო-აზერბაიჯანის ეკონომიკურ ურთიერთობებზე - აზერბაიჯანი კვლავაც რჩება ჩვენს ერთ-ერთ უმთავრეს სავაჭრო პარტნიორად, უფრო ზუსტად, რიგით მეოთხე სავაჭრო პარტნიორი ქვეყანაა - 2021 წლის 10 თვეში ორმხრივი ვაჭრობა 16%-ით, ხოლო ექსპორტი აზერბაიჯანში 22%-ით გაიზარდა. აზერბაიჯანი განსაკუთრებით მნიშვნელოვანი ბაზარია ქართული ექსპორტისთვის და მე კიდევ ერთხელ მომეცა შესაძლებლობა, რომ მესაუბრა ქართული პროდუქციის უფრო თავისუფალი შესვლის რეჟიმზე აზერბაიჯანის ბაზარზე, ამ კუთხით ძალიან ბევრი ტექნიკური საკითხია, რომლის გადაწყვეტასაც ჩემი კოლეგა შემპირდა", - განაცხადა ნათია თურნავამ.
შეხვედრაში მონაწილეობდნენ ეკონომიკის მინისტრის მოადგილეები გენადი არველაძე და გურამ გურამიშვილი, საქართველოს სავაჭრო - სამრეწველო პალატის პრეზიდენტი გიორგი პერტაია, აგრეთვე საქართველოს ელჩი აზერბაიჯანში ზურაბ პატარაძე.
მინისტრების შეხვედრაზე განსაკუთრებული აქცენტი გაკეთდა მსხვილ რეგიონალურ პროექტებზე, როგორც საქართველო-აზერბაიჯანის, ისე - საქართველო-აზერბაიჯანი-თურქეთის სამმხრივი თანამშრომლობის ფორმატში, რომელიც წლებია, აქტიურად და წარმატებით მიმდინარეობს. ამ მხრივ საქართველოს ეკონომიკის მინისტრმა ხაზი გაუსვა ბიზნესფორუმების ჩატარების მნიშვნელობას, რომლებიც 2012 წლიდან იმართება და წელს უკვე მეექვსედ შეახვედრებს ერთმანეთი სამი ქვეყნის საქმიანი წრეების წარმომადგენლებს.
„ჩვენ, სამ ქვეყანას - საქართველოს, აზერბაიჯანს და თურქეთს გვაქვს ძალიან ბევრი ერთობლივი მსხვილი რეგიონალური პროექტი - ნავთობის და გაზის, რკინიგზის სფეროში. ეს არის ძალიან კარგი შესაძლებლობა, რომ კიდევ ერთხელ გავცვალოთ შეხედულებები, თუ როგორ გავხადოთ ჩვენი ურთიერთ ეკონომიკური თანამშრომლობა კიდევ უფრო ნაყოფიერი და რაც მთავარია, მეტი კონტაქტები დავამყაროთ ქართულ და აზერბაიჯანულ ბიზნესებს შორის", - აღნიშნა ნათია თურნავამ.
მინისტრმა აღნიშნა, რომ ქვეყნებს შორის ეკონომიკურ თანამშრომლობას მზარდი ხასიათი აქვს.
"ჩვენ კვლავ ვმუშაობთ თანამშრომლობის გაფართოებაზე ყველა მიმართულებით, მათ შორის - ენერგეტიკა, ტრანსპორტი, ლოგისტიკა, ვაჭრობა, ორმხრივი ინვესტიციები. დღევანდელ ბიზნესფორუმს რაც შეეხება, ეს არის კარგი შესაძლებლობა სამმხრივი პროექტების იდენტიფიცირების კუთხით, რადგან ჩვენ ქვეყნებს შორის ვაჭრობა ყოველწლიურად სულ უფრო აქტიურად მიმდინარეობს. დარწმუნებულები ვართ, რომ სამივე ქვეყნის საქმიანი წრეებისთვის სასარგებლო პროცესში ბიზნესებს შორის კონტაქტების გაღრმავება განამტკიცებს რეგიონალური თანამშრომლობას", - განაცხადა თურნავამ.
