"მნიშვნელოვანია, რომ რეგიონების განვითარება ქალაქების განვითარების თანაბარი იყოს"
“ქვეყნის ეკონომიკა მზარდია, თუმცა რეგიონების წილი ამ მონაცემებში არ არის ისეთი თვალშისაცემი როგორსაც ჩვენ ვისურვებდით.” – ამის შესახებ ბიზნესასოციაციის აღმასრულებელი დირექტორის მოადგილე აკაკი საღირაშვილმა განაცხადა.
მისი განმარტებით, მნიშვნელოვანია, რომ რეგიონების განვითარება ქალაქების განვითარების თანაბარი იყოს.
„გარკვეული ინიციატივები მხარდაჭერილია როგორც ბიზნესის მხრიდან ისე ადგილობრივ დონეზე, ვგულისხმობ საგადასახადო სისტემის მოდერნიზებას, რომლის მიხედვითაც ქონების გადასახადის ნაწილი რეგიონში უნდა დარჩეს, რაც იმპულსის მიმცემი იქნება მუნიციპალიტეტების განვითარებისთვის. ამაზე მსჯელობა მიდის და ჯერ გადაწყვეტილი არ არის, თუმცა ეს ინიციატივა ღირს, რომ უფრო სიღრმისეული განხილვის საგნად ვაქციოთ.“-აღნიშნა აკაკი საღირაშვილმა.
მისივე განმარტებით, ბიზნესისთვის რეგიონებში გამოწვევებს შორის ყველაზე მნიშვნელოვანი კვალიფიციური კადრების დეფიციტია.
„ეს პრობლემა მხოლოდ რეგიონებში არ არის და ზოგადად ქვეყანაშია, კვალიფიციური სამუშაო ძალის ნაკლებობა გვაქვს. ამ მხრივ მთავრობას და ბიზნესს გვმართებს მეტი ძალისხმევა, რომ ეს პრობლემა მოვაგვაროთ, სხვანაირად ინვესტიციებზე ეკონომიკურ ზრდაზე ჩვენ ოცნებაც არ უნდა გვქონდეს.“-აღნიშნა აკაკი საღირაშვილმა.
მისივე განმარტებით, რეგიონების დონეზე პრობლემად ბიუროკრატიაც სახელდება, თუმცა ბოლო კვლევებით ეს საკითხი შედარებით უკანა პლანზეა გადანაცვლებული.
