მინისტრი: როგორც პანდემიას ვერ აიცილებს მხოლოდ საქართველო, ასევე ინფლაციას

ლაშა ხუციშვილის თქმით, ქვეყანაში ერთ-ერთი მთავარი პრობლემა ინფლაციაა, როგორც მსოფლიოს ბევრ ქვეყანაში.

“შეუძლებელია, რომ საერთაშორისო ბაზრებზე ფასების ზრდა არ აისახოს საქართველოს ეკონომიკაზე. მთელ მსოფლიოში მიჩნეულია, რომ ინფლაცია პანდემიის თანმდევი ეფექტია და როგორც პანდემიას ვერ აიცილებს მხოლოდ საქართველო, ასევეა ინფლაციის შემთხვევაშიც.

ეროვნულმა ბანკმა ამ მიმართულებით ძალიან ბევრი ნაბიჯი გადადგა. რეფინანსირების განაკვეთის გაზრდის გარდა, სებ-ს ძალიან ბევრი ინსტრუმენტი აქვს იმისთვის, რომ ინფლაციის მაჩვენებლი დასტაბილურდეს,” - აღნიშნავს ლაშა ხუციშვილი.

შეგახსენებთ, რომ საქართველოში ბოლო რამდენიმე თვეს ორნიშნა ინფლაციაა. ინფლაციის მაღალი მაჩვენებლით დაიწყო 2022 წელიც და იანვარში 13.9%-იანი ინფლაცია იყო.

მაღალი ინფლაციის პირობებში სებ-ი მკაცრ მონეტარულ პოლიტიკას ინარჩუნებს. მონეტარული პოლიტიკის კომიტეტმა ბოლო სხდომაზე რეფინანსირების განაკვეთი 10.5%-ზე შეინარჩუნა. ცენტრალური ბანკი ინფლაციის შემცირებას გაზაფხულიდან ელის და ვარაუდობს, რომ 2022 წლის ბოლოს ინფლაცია მიზნობრივ მაჩვენებელს (რომელიც 3%-ია) მიუახლოვდება.