მინისტრი: მარტიდან ინფლაციის მაჩვენებლის ეტაპობრივ კლებას ველით

ფინანსთა მინისტრი ორნიშნა ინფლაციას ერთჯერადი ფაქტორებით ხსნის და მოლოდინი აქვს რომ მომავალი წლის მარტიდან მაჩვენებელი შემცირებას დაიწყებს.

ლაშა ხუციშვილმა 2022 წლის ბიუჯეტის პროექტის გადამუშავებული ვერსიის პარლამენტში წარდგენისას განაცხადა, რომ  მაღალი ინფლაცია პანდემიის ერთ-ერთი ყველაზე ხანგრძლივად შენარჩუნებული ეკონომიკური პრობლემაა მთელ მსოფლიოში.

„უმეტესწილად ჩვენი ორნიშნა ინფლაცია ერთჯერადი ფაქტორებითაა გამოწვეული. მომდევნო წლის მარტიდან, ერთჯერადი ფაქტორების ამოწურვის პარალელურად, ჩვენ ველით ინფლაციის მაჩვენებლის ეტაპობრივ კლებას და წლის ბოლომდე მიზნობრივ მაჩვენებელთან დაბრუნებას“, - განაცხადა მინისტრმა.

მისივე თქმით, ტურიზმის არასრული აღდგენის მიუხედავად, წელს მიმდინარე ანგარიშის დეფიციტი მაინც გაუმჯობესდა.

„ჩვენს ეკონომიკაში ტურიზმის მაღალი წილი იყო მიზეზი იმისა, რომ პანდემიის გავლენა ერთ-ერთი მაღალი გვქონდა რეგიონში. გასულ წელს, მარტის შემდგომ თითქმის განულდა ტურისტული ვიზიტები, რაც საკმაოდ მძიმე დარტყმა იყო სექტორისთვის. მიმდინარე წელს, გაზაფხულიდან მოყოლებული ეტაპობრივად ხდება ტურიზმის აღდგენა და ივლისდან ტურიზმიდან მიღებული შემოსავალი 2019 წლის 50%-ს აჭარბებს. წლის დასაწყისის დაბალი ტემპის გათვალისწინებით, 2021 წელს ტურიზმიდან ეკონომიკაში მიღებული შემოსავლები 2019 წლის მესამედს მიაღწევს,“ - განაცხადა ფინანსთა მინისტრმა, ლაშა ხუციშვილმა.

მისი თქმით, სწრაფი აღდგენა ფიქსირდება საგარეო ვაჭრობაშიც. მაღალი ტემპებით იზრდება ფულადი გზავნილებიც და 2019 წლის მაჩვენებელს 40%-ით აღემატება.