ეკონომიკა
20/07/2022
ლევან დავითაშვილი: თურქმენეთი საქართველოს დერეფნის გამოყენებით დაიტერესებულია
თურქმენეთთან ტრანსპორტის სფეროში თანამშრომლობის ხელშეკრულებას ხელი მოეწერა, რომელიც საშუალებას იძლევა, აშხაბადთან პირდაპირი ფრენები დაინიშნოს.
ეკონომიკის მინისტრის ლევან დავითაშვილის განცხადებით, ეს ხელს შეუწყობს ეკონომიკური ურთიერთობების კიდევ უფრო გაღრმავებას.
მისი თქმით, თურქმენეთი საქართველოსთვის მნიშვნელოვანი სავაჭრო პარტნიორია.
"განვიხილეთ სავაჭრო ურთიერთობების გაღრმავების შესაძლებლობები. ის, რომ მოიხსნას ბარიერები ქართულ პროდუქციაზე და მეტ ქართულ პროდუქტს თურქმენეთში ექსპორტის შესაძლებლობა გაუჩნდეს. ასევე ჩვენთვის მნიშვნელოვანია სატრანსპორტო საკითხების განხილვა",- აღნიშნა ლევან დავითაშვილმა.
მინისტრის განცხადებით, თურქმენეთი დაინტერესებულია საქართველოს დერეფნის გამოყენებით. ეს არის დამატებითი ტვირთბრუნვის გაზრდის შესაძლებლობა, საუბარია რამდენიმე მილიონ ტონა დამატებით ტვირთნაკადზე.
"თურქმენეთი მნიშვნელოვანი ქიმიური მრეწველობის მქონე ქვეყანაა, რომელსაც აინტერესებს საქართველოს დერეფნის გამოყენება. საქართველოს სატრანსპორტო და ლოგისტიკური ინფრასტრუქტურის გამოყენების მეშვეობით თავისი პროდუქციის გატანა. ეს არის დამატებითი ტვირთბრუნვის გაზრდის შესაძლებლობები. საუბარია რამდენიმე მილიონ ტონა დამატებით ტვირთნაკადზე საქართველოს დერეფნის გამოყენებით. ეს მნიშვნელოვანი შეთანხმება შედგა და იმედი მაქვს, რომ უახლოეს ხანებში დამატებითი ტვირთები გაჩნდება თურქმენეთიდან საქართვლოს მიმართულებით. ასევე ჩვენ ვისაუბრეთ ენერგეტიკის სფეროში თანამშრომლობაზე. დღეს თურქმენეთი საქართველოში ნავთობ და ნავთობქიმიის პროდუქტებს აგზავნის, მაგრამ აქ საუბარია იმაზე, რომ საქართველოში იაფი ენერგორესურსები შემოტანა განვიხილოთ და ამ საკითხზე ჩვენი სამინისტრო კოლეგებთან ერთად იმუშავებს მომავალშიც", - განაცხადა ლევან დავითაშვილმა.
